Qazaqstannyń qurmetti sáýletshisi, «Astana-Báiterek» monýmentiniń avtory Aqmyrza Isauly Rústembekov ómirden ozdy. Qaiǵyly qaza jaily «Almatygenplan» ǴZI habarlady.
«2020 jyldyń 29 shildesinde Qazaqstan sáýletshiler odaǵynyń prezidenti Aqmyrza Isauly Rústembekov qaitys boldy», - delingen habarlamada.
Aqmyrza Rústembekov - Qazaqstan Respýblikasynyń eńbek sińirgen qairatkeri, Qazaqstannyń qurmetti sáýletshisi, Shyǵys elderiniń Halyqaralyq sáýlet akademiiasynyń korrespondent-múshesi, Qazaq bas sáýlet-qurylys akademiiasynyń qurmetti professory, Resei sáýletshiler odaǵynyń qurmetti múshesi, Qazaqstan dizainerler odaǵynyń múshesi.
«Astana-Báiterek» nysany úshin ol TMD elderiniń sáýletshiler odaǵynyń Halyqaralyq qaýymdastyǵynyń X-shi halyqaralyq baiqaýynda Gran-pri men altyn medalǵa ie boldy.
2003 jyly Sofiiadaǵy Búkilálemdik sáýlet Triennalynyń kúmis medalin, 2003 jyly Bishkektegi Sáýlet festivalinde Gran-pri jáne Qyrǵyz Respýblikasy Sáýletshiler odaǵynyń altyn medalin ielendi.
