Baiqońyr qalasynyń barlyq mektebinde qazaq tili men Qazaqstan tarihy oqytylady. Bul týraly Qyzylorda oblysy ákimi Gúlshara Ábdiqalyqova aitty, dep habarlaidy Sputnik Qazaqstan.
"Biz Baiqońyr qalasynyń mektepterinde qazaq tili, qazaq ádebieti men Qazaqstan tarihyn oqytý jaily kelistik. Bul pánder reseilik jáne qazaqstandyq standarttar boiynsha oqytatyn mektepterde engiziledi", - dedi Ábdiqalyqova úkimet kýlýarynda.
Aitýynsha, bul másele kópten beri talqylanyp júr.
"Bizdiń mektepterde, Resei mektepterinde qazaq balalary oqidy. Bizdiń búldirshinder úshin óz tili men tarihyn taný jáne úirený jańa bastama bolady degen oidamyn", - dedi oblys ákimi.
Qazir eki eldiń bilim ministrlikteri jumys mehanizmin pysyqtap jatyr. Qyzylorda oblysy óz tarapynan mektepterdi bilikti muǵalimdermen, oqýlyqtarmen, qajetti materialdarmen qamtamasyz etedi.
Aita keteri, Resei Baiqońyrdy Qazaqstannan jalǵa alyp otyr.
