Batys Qazaqstan oblysyna 16 maýsym kúni 62540 doza reseilik «Spýtnik V» vaktsinasynyń II komponenti jetkizildi.
Bul týraly búgin oblystyq densaýlyq saqtaý basqarmasy basshysynyń mindetin atqarýshy Arman Qalibekov óńirlik kommýnikatsiialar qyzmeti alańynda ótken brifingide málim etti, dep habarlaidy "Ult aqparat".
Onyń aitýynsha, vaktsina óńirdegi barlyq meditsina uiymdaryna bólinip berilgen.
Qazirgi tańda meditsina qyzmetkerleri turǵyndardy egilýge shaqyryp, vaktsinatsiialaý jumystaryn jalǵastyrýda.
Arman Talǵatulynyń sózine qaraǵanda, naýqan bastalǵannan beri oblysqa barlyǵy 269100 doza (148050-i – birinshi, 121050-i – ekinshi komponent) kelip tústi. Sonyń ishinde 136560-y (105550-i – I, 93550-i – II komponent) – Reseide óndirilgen «Spýtnik V» vaktsinasy.
Sondai-aq 4 myń doza (2 myńy – I, 2 myńy – II komponent) otandyq «QAZVAS» vaktsinasy, 50 myń doza (32500-i – I, 17500-i – II komponent) Birikken Arab Ámirlikterinde óndirilgen «Hayat - Vax» jáne 16 myń doza (8 myńy – I, 8 myńy – II komponent) qytailyq «CoronaVac» vaktsinasy jetkizilgen bolatyn.
Oblys boiynsha 80867 adam vaktsinanyń birinshi, 44543-i ekinshi komponentimen egildi.
«Halyqty COVID-19 indetinen qorǵaýdyń jalǵyz ári tiimdi joly vaktsinatsiialaý bolyp tabylady. Dúniejúzilik densaýlyq saqtaý uiymynyń usynymy boiynsha ujymdyq immýnitet qalyptastyrý úshin halyqtyń 60 paiyzdan kem emes bóligi vaktsinatsiialanýy tiis. Vaktsina belgili bir aýrýǵa qatysty arnaiy immýnitettiń qalyptasýyna yqpal etedi. Ekpe alǵan adam aýyrmaidy, syrqattanǵan kúnniń ózinde aýrý jeńil ótedi. Sondyqtan turǵyndardyń vaktsina alýda belsendilik tanytqany jón», dedi A.Qalibekov.
