"Batys Qazaqstanda ustalǵan radikaldy top músheleri ózara bailanysta bolmaǵan. Bul týraly búgin QR Parlamentiniń birlesken otyrysynda QR Ulttyq qaýipsizdik komitetiniń basshysy Vladimir Jumaqanov málim etti", - dep habarlaidy "Ult aqparat".
«Joq, eshkim jaralanǵan joq. Barlyǵy Qazaqstan azamattary, tanymal dini aǵymnyń músheleri, ózara bailanystary joq», - dep atap ótti V. Jumaqanov.
Aita keteiik, bunyń aldynda, Ulttyq qaýipsizdik komiteti 12-30 tamyz aralyǵynda Aqtóbe jáne Batys Qazaqstan oblystary aýmaǵynda úsh radikaldy toptyń is-áreketterine tosqaýyl qoiǵanyn habarlady.
Batys Qazaqstan oblysynyń 10 turǵyny jáne Aqtóbe oblysynyń 11 turǵyny qamaýǵa alyndy.
«Biz qylmystyq baptar boiynsha negizsiz adamdardy quryqtamaimyz. Sondyqtan jaqyn arada osy taqyrypqa bailanysty brifing bolady jáne sonda barlyq málimetterdi jariia etemiz dep sendirgim keledi», - dedi ol tilshilerdiń saýalyna jaýap qaiyrý kezinde.
«Biz adamdy betaldy qamaýǵa almaimyz. Eger adam qamaýǵa alynsa, degenmen onyń eshbir iske qatysy anyqtalmasa, árine biz ony birden bosatamyz. Biraq bizdi ol adam sotqa beretin bolsa, sot barlyǵyn oryn ornyna qoiady», - dedi UQK basshysy.
QR UQK málim etýinshe, olar radikaldardyń quqyq qorǵaý qyzmetkerlerine shabýyl jasaýdy, sondai-aq halyq kóp shoǵyrlanatyn oryndarda terrorizm aktilerin uiymdastyrýdy josparlaǵan.
«Eger biz lańkestik úshin ustaityn bolsaq, demek olar elde lańkestik akt uiymdastyrýdy kózdegen. Quqyq qorǵaý organdaryna, quqyq qorǵaý organdarynyń qyzmetkerlerine shabýyl jasaýǵa bekingen. Men buny naqty aita alamyn», - deidi V.Jumaqanov.
