Batys Qazaqstan oblysynda koronavirýstiń órshýine bailanysty qosymsha karantindik shekteý sharalaryn engizý usynyldy. Bul týraly oblys ákimi Ǵali Esqalievtiń tóraǵalyq etýimen ótken óńirlik jedel shtab otyrysynda aityldy, dep habarlaidy "Ult aqparat".
BQO sanitarlyq-epidemiologiialyq baqylaý departamentiniń basshysy Muhamǵali Aryspaevtyń málim etkenindei, qaýlyǵa ózgeristerdi 10 shildeden bastap engizý kózdelýde.
Atap aitqanda, parkterde, jaǵalaýlarda, alańdarda, skverlerde balalar men eresekterge jyljý quraldaryn (elektromobil, pedaldi avtomobil, samokat, karting, giroskýter jáne t.b.) jalǵa berýge, ashyq aýadaǵy atraktsiondar jumysyna tyiym salynady.
Monshalar saǵat 07.00-den 24.00-ge deiin jumys jasaityn bolady.
Sonymen qatar saýna, SPA ortalyqtar, basseinderdiń jumys kestesi qysqartylyp, saǵat 07.00-den 21.00-ge deiin ashyq bolmaq. Bul «Ashyq» qosymshasymen jumys istemeitin nysandarǵa qatysty.
Muhamǵali Qaiyrjanulynyń sózine qaraǵanda, 1 shildeden beri oblysta 1029 adamnan koronavirýs tabylyp, sonyń 40 paiyzy (407) Oral qalasynda, 16 paiyzy (169) Báiterek, 15 paiyzy (154) Bórli aýdanynda tirkeldi.
«Epidemiologiialyq ahýaldy baǵalaý matritsasyna sáikes 28 maýsymnan bastap Aqjaiyq, Bókei ordasy, Bórli, Báiterek, Syrym, Tasqala, Shyńǵyrlaý aýdandary jáne Oral qalasy qyzyl aimaqta tur. Jánibek, Kaztalov, Qaratóbe, Terekti sary, Jańaqala aýdany jasyl aimaqta», dedi M.Aryspaev.
Shilde aiynda memlekettik shekaradan anyqtamasyz 127 jolaýshy ótti. Olardyń arasynan koronavirýs shyqqan joq. Anyqtamasyz ótken 370 júrgizýshiniń bireýinen indet tabyldy.
7 shildeden bastap «Syrym» beketinde anyqtamasyz ótken júrgizýshiler men jolaýshylardy tekserý úshin jyljymaly zerthana qoiyldy.
Osy aida barlyǵy 11667 PTR zertteý (kúnine orta eseppen 1944) júrgizildi.
