Batys Qazaqstan oblysynda koronavirýs juqtyrǵandar arasynan «Delta» shtamy anyqtaldy, dep habarlaidy "Ult aqparat".
BQO sanitarlyq-epidemiologiialyq baqylaý departamenti basshysynyń orynbasary Nurlybek Mustaevtyń óńirlik kommýnikatsiialar qyzmeti alańynda ótken brifingide málim etkenindei, Nur-Sultan qalasyndaǵy respýblikalyq virýsologiialyq zerthanaǵa jiberilgen 22 synamanyń 18-inen nemese 81,2 paiyzynan «Delta» shtamy tabyldy.
Bul shtamnyń ereksheligi, óte tez taraidy, inkýbatsiialyq kezeńi buryn 14 kún bolsa, qazir jeti kún ishinde taralyp úlgeredi. Eger buryn naýqas 3-4 adamǵa juqtyrsa, «Delta» shtamy barlar 5-6 adamǵa taratady. Aýrý da aýyr ótedi.
Sońǵy aptada (25 maýsym – 1 shilde) aldyńǵymen (18-24 maýsym) salystyrǵanda, aýrý juqtyrý kórsetkishi 38,2 paiyzǵa ósip ketip otyr.
Sońǵy táýliktiń ózinde oblysta 143 adamnyń indet juqtyrǵany anyqtaldy.
Nurlybek Ermekulynyń sózine qaraǵanda, 1 maýsymnan beri 2568 naýqas tirkelse, sonyń 46 paiyzy (1180) Oral qalasy, 18 paiyzy (460) Báiterek, 13 paiyzy (326) Bórli jáne 6 paiyzy (151) Tasqala aýdanynyń úlesine tiedi.
Sonyń ishinde 14 jasqa deiingiler – 302, 15-17-degiler – 104, 18-25-tegiler – 190, 26-40-taǵylar – 703, 41-60-taǵylar – 778, 60-tan joǵarylar – 491. Kóbi – 41-60 jas aralyǵyndaǵy naýqastar.
Óńirde 1 maýsymnan beri memlekettik shekaradan ótken 38581 adamnyń 14366-sy – jolaýshylar. Anyqtamasyz ótken 763 jolaýshynyń ekeýinen kovid tabyldy. Sondai-aq halyqaralyq júk tasymalymen ainalysatyn 14557 júrgizýshiniń 2189-ynda anyqtama bolǵan joq. Bulardyń altaýynan indet anyqtaldy.
«Sońǵy aptada monitoring toptary 121 reid júrgizip, 573 nysandy qamtydy. 13 nysanda karantin talabyn buzýshylyq anyqtaldy. 11 hattama toltyrylyp, 997 195 teńge aiyppul salyndy. Nysandar jumysyn ýaqytsha shekteý úshin ekonomikalyq sotqa 2 material daiyndalýda. Oblysta epidemiologiialyq ahýal óte kúrdeli. Sondyqtan turǵyndarǵa sanitarlyq talaptardy tolyq saqtaý kerektigin eske salamyz», dedi N.Mustaev.
