Almaty oblysynyń ákimi Amandyq Batalov Ortalyq kommýnikatsiialar qyzmetindegi brifingte «Zeinetke shyǵýǵa daiynsyz ba?» degen suraqqa jaýap berdi, dep habarlaidy QazAqparat.
«Maǵan da osy suraq jii qoiylady. Memleket basshysy osy laýazymdy maǵan senip tapsyrǵasyn, oǵan meniń kúshim de, densaýlyǵym da jetedi. Men únemi jastarǵa, qaramaǵymdaǵy balalaryma aitamyn: erteń saǵat 12-de jumystan ketesiń dese, men sol 12-ge deiin bul júktemeni adal ári jaýapty túrde alyp júremin, halyq úshin jumys isteimin jáne Memleket basshysynyń tapsyrmalaryn oryndaimyn. Boldy. Al qashan ketetinim: erteń be, arǵy kúni me, bir jyldan keiin be, kerek adam ózi oilanyp, boljamdaryn jasai bersin», - dep jaýap berdi Amandyq Batalov.
Oblys ákimi árbir berilgen múmkindik arqyly adamdar úshin, oblys úshin qyzmet etip, óz tájiribesin jastarǵa berýge tyrysatynyn atap ótti.
«Jumys óte kóp. Bul jumystan tek jaqsy ister jasaǵanda ǵana lázzat alasyń», - deidi Amandyq Batalov.
Eske sala keteiik, búgin QR Prezidenti janyndaǵy Ortalyq kommýnikatsiialar qyzmetinde «Memleket basshysynyń tapsyrmasy aiasynda Almaty oblysynyń áleýmettik-ekonomikalyq damýy týraly» onlain baspasóz konferentsiiasy ótip jatyr.
