Bas prokýror Ǵizat Nurdáýletov pen Ishki ister ministri Erlan Turǵymbaev Qyzylorda oblysyna jumys saparymen bardy, dep habarlaidy "Ult aqparat".
«Vedomstvolardyń basshylary prokýrorlar men sotqa deiingi tergep-tekserý organdarynyń jańa is júrgizý jaǵdaiyndaǵy ózara is-qimyl tártibimen tanysty. Aita ketsek, Memleket basshysynyń tapsyrmasymen Qazaqstan EYDU elderiniń úlgisi boiynsha qylmystyq protsestiń úsh býyndy modeline kóshýdi bastaǵan. Politsiia dáleldemelerdi jinap, prokýratýra olarǵa quqyqtyq baǵa beredi, al sot úkim shyǵaratyn bolady. Bul tásildiń artyqshylyǵy - azamattardyń quqyqtaryn qorǵaý mehanizmi kúsheitiledi», - delingen Bas prokýratýra baspasóz qyzmetiniń málimetinde.
Qazirgi ýaqytta ózgeristerdiń birinshi kezeńi – prokýrorlardyń tergeý organdarynyń negizgi sheshimderin elektrondyq formatta kelisýi iske asyrylýda.
Eger buryn tergeýshi azamattardy qylmystyq turǵyda tartý máselesin derbes sheshse, endi onyń sheshimderi prokýror keliskennen keiin ǵana kúshine enedi.
Jańa jaǵdailarda prokýror tergeý protsesine belsendi qatysady jáne zańsyz sheshimderge ýaqytyly den qoiady.
Jyl basynan beri elimizde prokýrorlar 133 myń sheshimmen kelisip, 1,5 myńnan astam azamatty qylmystyq protseske negizsiz tartýdyń aldyn alǵan.
Sondai-aq, Bas prokýror oblys ákimi G.N. Ábdiqalyqovanyń, óńirdegi quqyq qorǵaý jáne arnaiy organdar basshylarynyń qatysýymen qylmysqa qarsy kúres jáne quqyq buzýshylyqtyń aldyn alý máseleleri jóninde keńes ótkizdi.
Prokýrorlarǵa qylmystyq protseste qadaǵalaýdy kúsheitý jáne organdar basshylarymen birlesip, naqty ózara is-qimyldy jolǵa qoiý tapsyryldy.
Is-shara qorytyndysy boiynsha basshylarǵa basqa da birqatar tapsyrmalar berildi.
