Foto: anatili.kazgazeta.kz
Bas prokýratýra qazaqstandyqtardy zań talaptaryn saqtaýǵa jáne áleýmettik jelilerde aqparattyq gigienany ustanýǵa shaqyrdy, dep habarlaidy Ult.kz.
Vedomstvonyń málimetinshe, qazirgi tsifrlyq keńistikte tekserilmegen aqparat pen «tsifrlyq qaýesetterdiń» taralýy qaýipti úrdiske ainalǵan. Kóp jaǵdaida paidalanýshylar derekterdiń rastyǵyna kóz jetkizbei, tek nazar aýdarý úshin jariialai salady.
Prokýratýra ókilderi mundai áreketterdiń saldary aýyr bolýy múmkin ekenin eskertti. Jalǵan aqparat qoǵamda dúrbeleń týǵyzyp, azamattardyń abyroiy men iskerlik bedeline nuqsan keltirýi, sondai-aq memlekettik institýttardyń jumysyna keri áser etýi yqtimal.
Sonymen qatar internette tolyq anonimdik joq ekeni atap ótildi. Zamanaýi tehnologiialar kez kelgen jariialanymnyń avtoryn anyqtaýǵa múmkindik beredi, al zańǵa qaishy áreketter úshin jaýapkershilik qarastyrylǵan.
Vedomstvo azamattardy jazba nemese pikir jariialamas buryn onyń saldaryn oilaýǵa shaqyrady. Jala jabý, qorlaý jáne kórineý jalǵan aqparat taratý zań aldynda jaýap berýge ákeledi.
Bas prokýratýra sóz bostandyǵy sheksiz uǵym emes ekenin eske saldy. Kez kelgen aqparat tekserilgen derekterge negizdelýi tiis jáne basqa adamdardyń quqyqtaryn buzbaýy qajet.
Qadaǵalaý organy negizgi maqsat – jazalaý emes, quqyq buzýshylyqtardyń aldyn alý ekenin atap ótti.
