«Nur Otan» partiiasynda 17 tamyz ben 3 qazan aralyǵynda praimeriz ótkizý josparlanǵany belgili. Qazaqstannyń partiialyq-saiasi damý tarihynda alǵash ret ol jalpyrespýblikalyq partiiaishilik masshtabta ótedi. Bul partiiamyzdyń «qaita jańǵyrýynyń» jáne aldaǵy Májilis pen máslihattarǵa sailaý naýqanyna daiyndyǵynyń qorytyndy kezeńderiniń biri, dep málim etti Baýyrjan Baibek.
«Bul partiiamyzdyń «qaita jańǵyrýynyń» jáne aldaǵy Májilis pen máslihattarǵa sailaý naýqanyna daiyndyǵynyń qorytyndy kezeńderiniń biri, dep jazdy saiasi uiym Tóraǵasynyń birinshi orynbasary Facebook-tegi paraqshasynda.
«Praimerizdiń negizgi maqsaty – partiialyq tizimderdi básekeli jáne aiqyn negizde qalyptastyrý. Nurotandyqtar elimizdiń barlyq aimaǵynda qoǵamnyń senimi men qoldaýyna ie bolǵan bedeldi partiia kóshbasshylaryn ózderi anyqtaidy.
Ókinishke qarai, koronavirýs pandemiiasy tyiylar emes jáne ómirimizdiń barlyq salasyna áser etip jatyr. Karantin jáne áleýmettik oqshaýlaný jaǵdaiynda biz qashyqtan jumys istep, ózara áreket etýge májbúrmiz. Mundai jaǵdai Qazaqstanda jáne álemde qashanǵa deiin sozylaryn eshkim de boljap aita almaidy. Bul – ishki saiasi protsesterdi de osyǵan beiimdeýdi talap etetin jańa qubylys. Sebebi barlyǵymyz úshin negizgi basymdyq – azamattarymyzdyń densaýlyǵy», dep atap ótken ol.
«Osyǵan bailanysty biz partiia Tóraǵasy, Elbasy Nursultan Ábishuly Nazarbaevtyń tapsyrmasy boiynsha partiiaishilik sailaýda onlain-formatta daýys berý mehanizmin pysyqtadyq. Saiasi keńes músheleri Praimeriz ótkizý erejesine engizilgen tiisti tolyqtyrýdy syrttai daýys berý arqyly qoldady.
Ózderińiz biletindei, partiia qyzmetin tsifrlandyrý boiynsha júieli jumystar 2014 jyldan-aq bastalǵan bolatyn. «Nur Otan» elimizde alǵashqy bolyp «Elektrondy partiia» aýqymdy jobasyn iske asyrýǵa kiristi. Partiianyń ortalyqtandyrylǵan derekter bazasy, onlain qoǵamdyq qabyldaýy, veb-portaly jasalyp, messendjerler men áleýmettik jeliler arqyly jańa kommýnikatsiia arnalary engizildi.
Jańa tsifrlyq múmkindikterdi halyq ta qarqyndy qoldanyp jatyr. Karantin engizilgen sátten bastap partiiaǵa onlain júginýshiler sany 5,3 ese, onyń ishinde Facebook pen Instagram arqyly – 17,5 ese, al Whatsapp boiynsha – 9,5 esege artty. Partiianyń qoǵamdyq qabyldaýyna birinshi jartyjyldyqta 224,1 myń adam habarlasty. Bul ótken jylmen salystyrǵanda 3,6 esege ósken. Osy máselelerdiń kóbi sheshildi jáne birqatary partiia baqylaýynda.
«Elektrondy partiia» jobasy «Praimeriz» aqparattyq júiesin ázirleýge negiz boldy. Ol veb-portal men mobildi qosymshadan turady. Bul rette biz sheteldik ozyq tájiribelerdi zerttep, tiisinshe qoldandyq.
Munda biz jeti bazalyq qaǵidatty basshylyqqa alamyz. Atap aitqanda, olar qoljetimdilik, avtonomdylyq, aiqyndyq, senimdilik, legitimdilik, kóp fýnktsionaldyq jáne qaýipsizdik qaǵidattaryn qamtidy. Bular júieni qoldanýǵa jeńil etip, aqparattyq qaýipsizdikti, sailaýshynyń «tańdaý qupiiasyn», syrttan aralasý men burmalaý táýekelderinen qorǵaýdy qamtamasyz etedi.
«Praimeriz» júiesi turǵyndarmen keri bailanysty barynsha kúsheitip, saýalnamalardy jedel júrgizýge, túrli bastamalar men zań jobalaryn talqylaýǵa, shalǵaidaǵy eldi mekenderdiń turǵyndarynyń pikirlerin tyńdaýǵa múmkindik beredi.
Sondyqtan «Praimeriz» júiesin ázirleýge qyzý atsalysqan IT-mamandar toby men partiia múshesi Asqar Jumaǵalievke erekshe alǵys aitqym keledi.
Onlain-format – partiianyń ashyq ári qoljetimdi bola túsýine jasalǵan taǵy da bir qadam. Ásirese, jastar úshin jaqsy múmkindik. Elbasynyń tapsyrmasy boiynsha árbir máslihat pen Májiliske arnalǵan partiialyq tizimderde keminde 20% 35 jasqa deiingi jastardy qamtý josparlanyp otyr.
Adal da básekelik negizde praimeriz ótkizý bárimiz úshin mańyzdy. Sarapshylar qoǵamdastyǵy aǵymdaǵy qoǵamdyq-saiasi máselelerdi sheshýde budan úlken úmit kútip otyr. Muny taiaýda ótken «Nur Otan» jaqtastary Ligasynyń diskýssiiasy naqty kórsetti.
Biz Liganyń búkil el kóleminde partiiashishilik tańdaýdyń ótkizilý barysyna qoǵamdyq baqylaý jasaý boiynsha bastamasyn qoldaimyz.
«Nur Otan» partiiasy elimizdi sózben emes, is júzinde damytqysy keletin barsha jandy praimerizge qyzý qatysýǵa shaqyrady», - dep túiindedi «Nur Otan» partiiasy Tóraǵasynyń birinshi orynbasary.
