© Sputnik / Tabyldy Kadyrbekov
Sýitsidti nasihattaý jáne esirtki sekildi internettegi qaýipti kontentten balalardy qorǵaityn arnaiy sim-karta iske qosyldy. Bul týraly Qazaqstannyń bas prokýrory Berik Asylov "H" áleýmettik jelisinde habarlady.
Belgili bolǵandai, bas prokýrordyń tapsyrmasy boiynsha 2023–2025 jyldarǵa arnalǵan balalardy zorlyq-zombylyqtan qorǵaý, sýitsidtiń aldyn alý jáne olardyń quqyqtary men ál-aýqatyn qamtamasyz etý jónindegi Keshendi josparǵa kámeletke tolmaǵandardy internettegi destrýktivti kontenttiń ziiandy áserinen qorǵaýǵa baǵyttalǵan usynystar ázirlendi.
Qazirgi ýaqytta bul usynystar Úkimettiń qaraýynda.
"Biz óz tarapymyzdan bul sharalardy júzege asyrýǵa kiristik. Máselen, Almaty qalasynda prokýratýra TELE2/ALTEL bailanys operatorymen birigip, "SIM KIDS" atty pilottyq jobany iske qosty. Bul – sýitsidti nasihattaý, pornografiia, esirtki, onlain-kazino jáne ózge de internet-qaterlerden qorǵaityn arnaiy balalarǵa arnalǵan sim-karta", - dep jazdy Asylov.
Osy sim-kartanyń kómegimen ata-analar balasynyń qandai qosymshalardy paidalanyp júrgenin baqylap, ziiandy saittarǵa qoljetimdilikti shektep, qurylǵy únsiz rejimde bolsa da, balasyna qońyraý shala alady.
"Joba ata-analar arasynda úlken qyzyǵýshylyq týdyrdy. Synaq kezeńi aiaqtalǵannan keiin bul sim-karta barshaǵa qoljetimdi bolady", - deidi bas prokýror.
