QR Aqparat jáne qoǵamdyq damý ministri Aida Balaeva BAQ-ta ótkir áleýmettik taqyryptardy taratýǵa qatysty óz pikirin bildirdi, dep habarlaidy QazAqparat.
Qazir elordada «Astana Media Week – 2021» jyl saiynǵy media aptalyǵy ótip jatyr. Aýqymdy media sharanyń aiasynda «Ótkir áleýmettik taqyryptardy túsindirý erekshelikteri» taqyrybynda dóńgelek ústel ótti.
«Ótkir áleýmettik taqyryptardy taratýda halyqaralyq tájiribege súiensek, olarda arnaiy qujat bar. Degenmen ótkir áleýmettik taqyryptardy taratýdy retteitin qujat barlyq BAQ-ta birdei emes. Mysaly, BBC- diń standarty boiynsha aqparat taratýshy onyń rastyǵyna, obektivtiligine, jeke pikirin qospai, emitsiiasyz jetkizýde halyq aldynda jaýapty. The New Work Times-tiń printsipteri boiynsha tilshi jumys barysynda óziniń saiasi ustanymy men pikirin bildirýge nemese bireýdiń jeke basyna nuqsan keltirýge ruqsat joq. Sol siiaqty atalǵan basylymnyń tilshilerine beiresmi derekterdi qoldanýǵa qatań tyiym salynǵan. Osy másele boiynsha óz elimizge kelsek, ótken jylǵy júrgizilgen monitoring nátijesinde otandyq BAQ betterinde 500-den astam material anyqtaldy. Ol materialdarda ótkir áleýmettik taqyryptardy taratýda quqyqbuzýshylyq oryn alǵan», - dedi Aida Balaeva.
Ministrdiń aitýynsha, elimizde BAQ týraly zańdy buzǵan 6 sheteldik saittyń jumysy toqtatyldy.
«BAQ-ta áleýmettik taqyrypty taratý, el qoǵamynda mańyzdy ról atqarady. Joǵaryda atalǵan zań buzýshylyqtar týraly olardyń basshylyǵyna resmi hat jiberilip, qatelikti joiý kerektigi eskertildi. Taǵy bir aityp ótetin jait, zań tek BAQ ókilderine arnalmaǵan, jalpy halyqqa arnalǵan. Sondyqtan áleýmettik ótkir taqyryptardy taratýda zańnan bólek, ádep, qoǵam aldyndaǵy jaýapkershilikti umytpaǵan jón», - deidi ol.
Aita ketsek, AMW-2021 barysynda halyqaralyq mediaqaýymdastyq músheleri aqparattyq kún tártibiniń ózekti máselelerin kóteredi. Is-sharaǵa bedeldi álemdik BAQ-tyń top-menedjerleri, memlekettik apparat ókilderi, tanymal jýrnalistter, dokýmentalister jáne AQSh, Ulybritaniia, Resei, Qazaqstan, Ózbekstan, Qyrǵyzstan blogerleri qatysady.
