Foto: QR MAM
Elimizdiń balabaqshalary men kolledjderinde daý-damailardy beibit jolmen sheshýge baǵyttalǵan mediatsiia qyzmetteri qurylady, dep habarlaidy Ult.kz.
Bul bastamany QR Oqý-aǵartý ministrligi qolǵa alyp otyr. Jańa júie balalar, stýdentter, pedagogtar men ata-analar arasyndaǵy túsinispeýshilikterdi tiimdi retteýge múmkindik beredi. Sonymen qatar, mediatsiia qyzmeti býllingtiń aldyn alýǵa da baǵyttalǵan.
Balabaqshalarda mediatsiia qurylymy tárbieshiler men ata-analarǵa búldirshinder arasyndaǵy kelispeýshilikterdi sheshýge kómektesedi. Bul balalardyń erte jastan til tabysý, bólise bilý, ortaq mámilege kelý jáne janjaldardy beibit jolmen sheshý daǵdylaryn qalyptastyrýǵa yqpal etedi.
Al kolledjderde jańa tetik stýdentter arasyndaǵy arazdyqty azaityp, qorlyq kórsetý jaǵdailarynyń aldyn alýǵa baǵyttalady. Sondai-aq bilim alýshylar arasyndaǵy qaqtyǵystardy tómendetýge múmkindik beredi.
Jumystyń biryńǵai júrgizilýi úshin Y. Altynsarin atyndaǵy Ulttyq bilim akademiiasy ázirlegen ádistemelik usynymdar men erejeler negizge alynady. Qujatta daýlardy sheshý men agressiianyń aldyn alýdyń naqty joldary kórsetilgen.
Mediatsiia toptarynyń quramyna direktordyń tárbie isi jónindegi orynbasarlary, pedagog-psihologtar, áleýmettik mamandar, ata-analar, qoǵamdyq uiym ókilderi, sondai-aq jas ereksheligine qarai bilim alýshylardyń ózderi de kiredi.
Aita keteiik, bul tájiribe buǵan deiin «100 mediativtik mektep» jobasy aiasynda synaqtan ótip, óz tiimdiligin dáleldegen.
