Órt saldarynan zardap shekken otbasyǵa jan-jaqty kómek kórsetiledi, dep habarlaidy elorda ákimdiginiń resmi saity.
Baqyt Sultanov «Kóktal-1» turǵyn alabyndaǵy úiden shyqqan órt saldarynan bes balanyń qazasyna bailanysty shuǵyl keńes ótkizdi.
«Úlken qasiretke dýshar bolǵan otbasyǵa kóńil aityp, birge qaiǵyramyn. Qala basshylyǵy oqiǵa ornyna bardy, qaza bolǵan balalardyń ata-anasymen psihologtar jáne áleýmettik qyzmet mamandary jumys istep jatyr», - dedi qala ákimi.
Óz kezeginde, TJD bastyǵynyń mindetin atqarýshy Marǵulan Amanbaevtyń túsindirýinshe, buǵan deiin Kóktal-1 turǵyn alabynda órt jáne basqa da tótenshe jaǵdailardyń aldyn alýǵa baǵyttalǵan jumystar júrgizilgen.
«Bul úige TJ departamentiniń qyzmetkerleri kelip, tiisti eskertýlerin jasady, olardy joiý boiynsha uiǵarym berilgen», - dedi Amanbaev.
Baqyt Sultanov aýdan ákimderiniń tótenshe jaǵdailar departamenti jáne politsiiamen birlesip tez arada turǵyn alabynyń árbir úiine kirip, órt qaýipsizdigi erejeleriniń saqtalýyn tekserýdi talap etti.
«Bul sizderdiń tikelei mindetterińiz, ony únemi eske salýym kerek emes! Ol jumysty buryn júrgizý tiis edi, tótenshe jaǵdailar departamentiniń qateligi bul. Osyndai úilerdiń turǵyndaryn bilýlerińiz qajet», - dedi ol.
Qala ákimi quzyretti organdarǵa qaiǵyly oqiǵanyń barlyq mán-jaiyn anyqtaýdy tapsyrdy.
Eske sala keteiik, 4 aqpan túninde elordanyń Saryarqa aýdanyndaǵy Kóktal-1 turǵyn alabynda órt shyqty. Órtti sóndirý barysynda 2006, 2008, 2013, 2015, 2018 jyly dúniege kelgen 5 balanyń denesi tabyldy. Eń kishisi nebári úsh ailyq sábi edi.
