Qalalardy keshendi salýdyń jańa standarttary engizilip jatyr. Bul týraly QR Indýstriia jáne infraqurylymdyq damý ministri Beibit Atamqulov málim etti, dep habarlaidy QazAqparat.
«Memlekettik jáne kvazimemlekettik sektorlar investitsiialarynyń qatysýymen salynatyn obektiler qunyn arttyrýǵa jol bermeý úshin memlekettik saraptama portalynda onlain kalkýliatordy engize otyryp, qurylysqa jumsalatyn shyǵyndardyń shekti limitteri belgilendi. Biregei smeta baǵasy, olardyń anyqtamalary ázirlenedi. Bul óńirler boiynsha bir nysandy salý qunynyń aýytqýyn, sondai-aq jobalaý jáne jobalyq-smetalyq qujattamasyn saraptaý kezeńinde jobalardyń smeta qunynyń ósýin boldyrmaidy», - dedi B. Atamqulov.
Onyń aitýynsha, qoldanystaǵy zańnamaǵa sáikes memlekettik sáýlet-qurylys baqylaý organdary shaǵym túspese tekserýge bara almaidy. Memlekettik sáýlet-qurylys baqylaý organdary obektilerdi paidalanýǵa qabyldaýǵa qatyspaidy.
«Baqylaýdyń álsizdiginen qurylys salýshylarda nemquraidylyq baiqalady jáne nysandar kemshilikterimen qabyldanady», - dedi ministr.
Memlekettik baqylaýdy kúsheitý úshin mynadai shuǵyl sharalardy qamtityn zań jobasy ázirlendi:
1. Aýmaqta qurylys salýdy sapasyz josparlaýdy boldyrmaý maqsatynda qala qurylysy saraptamasyn engizý;
2. Qurylystyń barlyq kezeńinde obektilerge josparly baqylaý engizý jáne memlekettik sáýlet-qurylys baqylaý organdarynyń obektilerdi paidalanýǵa qabyldaýǵa qatysýy;
3. Paidalanylatyn materialdar men oryndalǵan jumystardyń sapasyna zerthanalyq jáne tehnikalyq tekserý júrgizý úshin táýelsiz memlekettik zerthanalyq qyzmet qurý.
«Sonymen qatar, retsiz qurylys salýdy boldyrmaý jáne qala qurylysyn josparlaýdy retteý sheńberinde halyqaralyq tájiribeni eskere otyryp, halyqtyń jaily turýy úshin qalalardy keshendi salýdyń jańa standarttary engizilip jatyr. Standarttar birizdendiriledi», - dedi vedomstvo basshysy.
Onda mynalar qamtylady:
- qala aýmaqtaryn keshendi damytý qaǵidattary;
- qala aýmaqtaryn damytý standarty;
- qalalardyń kelbetin qalyptastyrý standarty;
- bos aýmaqtardy igerý standarty.
