Sheshenstan respýblikasynyń basshysy Ramzan Qadyrovtan koronavirýs belgileri baiqalyp, aýrýhanaǵa tústi. Ol Máskeýdegi emhanalardyń birine ushaqpen jetkizildi. Bul týraly Baza jáne "Interfaks" agenttigi habarlady. Aqparat resmi túrde rastalǵan joq.
"Interfaks" agenttigi Máskeýdegi meditsina qyzmetkerleriniń birine silteme jasai otyryp "Qadyrovtan koronavirýs belgileri baiqalǵan, dárigerler baqylaýyna alyndy" dep jazdy. TASS agenttigi de qupiia derekkózine silteme jasap, osyǵan uqsas aqparat taratty.
"Baza" saitynyń jazýynsha, Qadyrovtyń ókpesi aýyrǵan. Buǵan deiin syrqattanǵan kezde tumaýǵa shaldyqqany aitylǵan. Alaida sońǵy kúnderi jaǵdaiy kúrt nasharlaǵan.
Osyǵan deiin telegram-arnalarynyń biri "Sheshenstan úkimetindegi qupiia derekkózge silteme jasap" Qadyrovpen birge densaýlyq saqtaý ministri Elhan Súleimanov ta aýrýhanaǵa tústi dep jazǵan. Biraq bul aqparat ta resmi rastalǵan joq.
Buǵan deiin Sheshenstan basshysynyń kómekshisi Ahmed Dýdaev respýblika basshysy men ministrdiń aýrýhanaǵa túskenin joqqa shyǵarǵan.
Sheshenstanda koronavirýs indetine bailanysty qatań karantin sharalary kúshine engen. Respýblikada komendanttyq saǵat engizilip, qoǵamdyq kólik jumysy toqtaǵan. Reseidiń basqa oblysynan kirýge tyiym salynǵan. Koronavirýspen kúres jónindegi jedel shtabtyń málimetinshe, Sheshenstanda koronavirýs juqqan myńnan astam adam anyqtalǵan.
Osyǵan deiin Qadyrov koronavirýs juqqan naýqastardy emdegen meditsina qyzmetkerleri qorǵanysh quraldarynyń jetispeitinin aityp shaǵymdanǵan kezde olardy jumystan shyǵarýdy talap etken. Keiinirek aýrýhananyń birneshe qyzmetkeri keshirim surap, qorǵanysh quraldarynyń jetkilikti ekenin aitqan. Meditsina ortalyǵynyń bas dárigeri jáne shaǵymdanǵan dárigerlerdiń biri jumysynan ketti.
