Bilim jáne ǵylym ministri Ashat Aimaǵambetov jazǵy mektep júiesi oqýshylarǵa májbúrli bolmaýy kerektigin eskertti, dep habarlaidy "Ult aqparat".
«Qazir oqý jyly aiaqtaldy. Jańa oqý jylyna daiyndyq bastalyp jatyr. Daiyndyq jumysynyń barysynda ministrlik bergen tapsyrmalarǵa sáikes jumysty formaldy túrde emes, jaqsylap, naqtylap uiymdastyrý kerek. Biz sizdermen keliskendei, 17 tamyzdan bastap mektepterde jazǵy mektep formatynda eki aptalyq daiyndyq sharasy ótkiziledi. Bilýimshe óńirler bul jumysty uiymdastyrýdy bastapty. Balalarǵa bul rette óz erkimen qatysý múmkindigin berýimiz kerek. Májbúrlep, jazǵy mektepke qatysý kerek degen talap qoiylmaýy tiis», - dedi Ashat Aimaǵambetov Bilim jáne ǵylym ministrliginiń apparattyq otyrysynda.
Ministrdiń aitýynsha matematika, qazaq tili, orys tili pánderi boiynsha balalar oqý jyly qarsańynda mektepke baryp, daiyndalǵysy kelse, sol jumys uiymdastyrylatynyn málim etti.
«Taǵy da aitaiyn: májbúrlep, formaldy túrde bul jumysty júrgizýge bolmaidy. Bul ýaqytta muǵalimder eńbek demalysynan shyǵady. Sondyqtan eshqandai kedergi bolmaidy dep oilaimyn», - dedi ol.
