QR Bilim jáne ǵylym ministri Ashat Aimaǵambetov Taraz qalasyna jumys saparymen kelip, Jambyl oblysynyń ákimi Berdibek Saparbaevpen birge mektep direktorlarymen kezdesti, dep habarlaidy "Ult aqparat".
Kezdesý M.H.Dýlati atyndaǵy Taraz óńirlik ýniversiteti bas ǵimaratynyń májilis zalynda ótti.
Basqosýdy ashqan oblys ákimi jyl saiyn oblysta jańa mektepter salynyp, tozyǵy jetkenderi kúrdeli jóndeýden ótip jatqandyǵyn atap ótti. Jańa oqý jylynyń dástúrli formatta bastalý múmkindigin eskere otyryp, Prezident tapsyrmasyna sáikes mektepterdiń balalardy qabyldaýǵa daiyndyǵy pysyqtalýda.
«Memleket basshysy Qasym-Jomart Toqaevtyń tapsyrmasyna sáikes bilim salasynda qolǵa alynǵan reformalar óz jalǵasyn tabatyn bolady. Bul baǵytta Jambyl oblysynda da aýqymdy jumystar júrgizilýde. PISA (matematikalyq saýattylyq deńgeiin baǵalaý), TIMSS (matematikalyq jáne jaratylystaný ǵylymdarynyń sapasyn zertteý) halyqaralyq zertteýleriniń taldaýy oblystyń joǵary kórsetkishterge qol jetkizgenin kórsetip otyr», - dedi Ashat Aimaǵambetov.
Ol óz sózinde bilim berý uiymdaryndaǵy balalardyń qaýipsizdigin qamtamasyz etý máselelerine nazar aýdartty.
«Oblystyń barlyq mektepterinde baqylaý kameralary ornatylyp, jyly sanitarlyq toraptarmen qamtylǵan. Mektepter kezeń-kezeńimen avariialyq dabyl túimelerimen, týrnikettermen jabdyqtalady, kameralar oblystyq Politsiia departamentiniń Jedel basqarý ortalyǵymen integratsiialanatyn bolady. Ár balanyń derekteri engizilgen áleýmettik kartalar ashylýda», - dedi oblys ákimi.
Ashat Aimaǵambetov ministrlik júzege asyrǵan birneshe jobalarmen tanystyryp, muǵalimder men mektep direktorlaryn irikteýdiń jańa erejeleri qabyldanatyndyǵyn jetkizdi.
Ministr mektep direktorlarynan bilim berý mekemelerindegi biýrokratiiany joiýdy talap etti. Ministrlikpen bilim berý uiymdarynyń pedagogtarynyń júrgizýi mindetti qujattardyń naqty tizbesin bekitipti.
«Buiryqqa sáikes kún saiyn tek eki qujat toltyrylýy tiis. Sol eki qujat boiynsha jumys isteý mańyzdy jáne muǵalimderdiń jumysyn qoldan qiyndatpaý kerek. Olardyń basty mindeti – sabaq ótkizip, balalarǵa bilim berýmen ainalysý. Muǵalimderdi sabaqtan tys jumystarǵa tartpańyzdar», - dedi ol.
Óz sózinde Berdibek Saparbaev ta mektep direktorlaryna tárbie úderisine erekshe nazar aýdarý qajettigin atap ótti.
Kezdesýge qatysýshylar da óz usynystary men suraqtaryn ortaǵa saldy.
