Ortalyq kommýnikatsiialar qyzmetinde ótken brifingide Almaty oblysy Ile aýdanynda 150 aǵashty kesýge ruqsat bergen ákimdik qyzmetkerleri týraly másele kóterildi, dep habarlaidy "Ult aqparat".
«Almaty oblysy Ile aýdany ákimdiginiń jaýapty qyzmetkerleri Ótegen aýylyndaǵy Sultan Beibarys tasjolynyń boiynda ósip turǵan 150-den astam saý eresek aǵashty kesýge zańsyz ruqsat bergen. Balmuzdaq shyǵaratyn zaýyt qyzmetkerleri kólik qoia almaityn bolmaǵandyqtan, 150 túp saý aǵashty kesip, ornyna avtoturaq jasaǵan. Aǵashty zańsyz kesken kompaniiaǵa Ekologiia, geologiia jáne tabiǵi resýrstar ministrligi tekserý júrgize me? Kompaniia men aǵash kesýge ruqsat bergen ákimdik ókilderi jaýapqa tartyla ma», - dedi saýal iesi.
Ekologiia, geologiia jáne tabiǵi resýrstar vitse-ministri Áliia Shalabekova atalǵan oqiǵa boiynsha jergilikti deńgeide tekserý bastalǵanyn atady.
«Qazir bul fakt boiynsha oblystyq aýmaqtyq inpektsiia tergeý júrgizip jatyr. Sonyń qorytyndysy boiynsha qosymsha aqparat beremiz», - dedi vedomstvo ókili.
Orman sharýashylyǵy jáne janýarlar dúniesi komiteti tóraǵasynyń mindetin atqarýshy Erlan Qutpanbaevtyń aitýynsha, ázirge aǵash kesýge ákimdik ókilderi ruqsat bergeni týraly málimet naqtylanbaǵan.
«Ruqsatty kim bergeni jaiynda tekserý jumystary júrip jatyr. Kimniń kináli ekenin, naqty kimniń ruqsat bergenin sol kezde bilemiz. Kimniń ruqsat bergeni, tipti ruqsat berildi me, joq pa? Ázirge onyń bári aiqyndalǵan joq», - dedi komitet basshysy.
