Foto: Zakon.kz
Soltústik Qazaqstan oblysynda sot múmkindigi shekteýli jasóspirimniń quqyǵyn qorǵap, meditsinalyq-áleýmettik saraptama komissiiasynyń sheshimin zańsyz dep tanydy, dep habarlaidy SQO sotynyń baspasóz qyzmeti.
Sotynyń málimetinshe, ádildik izdegen balanyń anasy sotqa júgingen. Onyń aitýynsha, jasóspirim erte jastan beri sozylmaly dert – iývenildi idiopatiialyq artritpen aýyrady. Bul aýrý býyndardyń aýyrsynýyna, qimyl-qozǵalystyń shektelýine jáne aiaq-qoldyń deformatsiiasyna ákelýi múmkin.
Bala turaqty túrde dárigerlerdiń baqylaýynda bolyp, uzaq ýaqyt em qabyldaǵan. Oǵan tize býyndaryna ota jasalyp, densaýlyq jaǵdaiyna bailanysty úide oqytý taǵaiyndalǵan.
Alaida ótken jyldyń qazan aiynda qaita kýálandyrý kezinde óńirlik komissiia jasóspirimniń múgedektigin rastaýdan bas tartqan. Sheshim aǵza fýnktsiialarynda turaqty buzylystar joq degen ýájben negizdelgen.
Sot talqylaýy barysynda saraptama júrgizý kezinde óreskel zańbuzýshylyqtar anyqtaldy. Atap aitqanda, tekserýge mindetti mamandar – revmatolog, travmatolog jáne ortoped qatystyrylmaǵan. Iaǵni, komissiia sheshimdi tiisti beiindi dárigerlerdiń qorytyndysynsyz qabyldaǵan.
Birinshi satydaǵy sot bul sheshimdi zańsyz dep tanyp, kúshin joidy. Keiin ákimshilik ister jónindegi sot alqasy da osy uiǵarymdy qoldap, rásim talaptarynyń buzylýy sheshimniń zańdylyǵyna tikelei áser etkenin atap ótti.
Sot qaýlysy zańdy kúshine endi.
