Sheshenstan jáne Reseidiń resmi tulǵalary Sheshenstan basshysy Ramzan Qadyrovtyń qaida ekenin aitpady, jaǵdaiyna bailanysty túsinikteme bergen joq. Buǵan deiin onyń koronavirýs infektsiiasyna bailanysty aýrýhanaǵa jatqyzylǵany týraly habar taraǵan.
Qadyrovqa koronavirýs juqqany rastalsa, Reseide COVID-19 aýrýyna shaldyqqan sheneýnikter taǵy bir adamǵa kóbeiedi. Koronavirýs anyqtalǵan sheneýnikter arasynda premer-ministr Mihail Mishýstin, Kreml baspasóz hatshysy Dmitrii Peskov bar.
Aty-jónin atamaǵan derekkózge siltegen "Interfaks" jáne RIA "Novosti" agenttikteri 21 mamyrda 43 jastaǵy Qadyrovtyń Máskeýdegi emhanaǵa jetkizilgenin jáne dárigerler baqylaýyna alynǵanyn habarlaǵan.
"Baza" telegram-arnasy 21 mamyrda jedel respiratorlyq virýs infektsiiasy belgileri anyqtalǵan Qadyrovtyń Máskeýdegi "eń myqty emhanalardyń birine" arnaiy ushaqpen jetkizilgenin jazǵan.
Resmi málimet boiynsha, Sheshenstanda myńnan astam adamǵa virýs juqqan, 11 adam qaitys bolǵan.
Jaqynda Qadyrov koronavirýs juqqan naýqastardy emdegen dárigerler qorǵanysh quraldary jetispeidi dep shaǵymdanǵan kezde olardy sógip, basshylaryn qyzmetten qýýdy talap etken.
