QR IIM videosynan kadr
Atyraý oblysyndaǵy Jangeldin aýylynda bir otbasynyń qaza bolýyna qatysty is boiynsha kúdikti Aqbaian Muqanǵalieva Almatyǵa jetkizildi, dep habarlaidy Ult.kz.
Óńirlik prokýratýranyń málimetinshe, ol statsionarlyq keshendi sot-psihologo-psihiatriialyq saraptama júrgizý úshin Almatydaǵy sot saraptamasy institýtyna jiberilgen. Saraptama qorytyndysy ázirge daiyn emes.
Buǵan deiin Muqanǵalieva sot sanktsiiasymen Atyraý oblysyndaǵy arnaiy meditsinalyq mekemege ornalastyrylǵan bolatyn. Prokýratýra ókilderi kúdiktiden psihikalyq aýytqý belgileri anyqtalǵan jaǵdaida, qosymsha saraptama Almatyda ótetinin habarlaǵan.
Qazirgi ýaqytta kúdiktige naqty aiyp taǵylmaǵan, bultartpaý sharasy da tańdalmaǵan. Quzyrly organ ókilderiniń málimetinshe, is boiynsha túpkilikti quqyqtyq baǵa barlyq mán-jailar anyqtalyp, saraptama nátijeleri alynǵannan keiin beriledi.
Sonymen qatar, is boiynsha negizgi kúdikti retinde tanylǵan Sultan Sársemalievke qatysty da keshendi sot-psihologiialyq jáne psihiatriialyq saraptama taǵaiyndalǵan. Onyń nátijesi de ázirge shyqpaǵan.
Sársemalievke Qylmystyq kodekstiń birneshe baby boiynsha aiyp taǵylǵan. Atap aitqanda, eki nemese odan da kóp adamdy óltirý, adamdar tobynyń aldyn ala sóz bailasýymen jasalǵan urlyq jáne alaiaqtyq faktileri boiynsha tergeý júrgizilýde.
Prokýratýranyń málimetinshe, urlyq pen alaiaqtyq epizodtary qaza tapqandardyń múlkin iemdený jáne malyn zańsyz satý derekterimen bailanysty.
