Foto: ashyq derekkóz
Atyraý oblysynyń Qyzylqoǵa aýdanyndaǵy Jangeldin aýylynda joǵalyp ketken otbasyǵa qatysty is boiynsha eki adamnyń máiiti tabyldy, dep habarlaidy Ult.kz.
Aldyn ala málimetterge sáikes, máiitter izdestirý jumystary barysynda aýyl aýmaǵyndaǵy saraidyń ishine kómilgen kúide anyqtalǵan. Aýyl turǵyndarynyń aitýynsha, tabylǵan marqumdar otbasynyń jasy úlken músheleri bolýy múmkin.
Eske salaiyq, Jangeldin aýylynda turatyn bir otbasynyń birneshe múshesi 2025 jyldyń kúzinen beri habar-osharsyz ketken bolatyn. Osy ýaqyt aralyǵynda politsiia tarapynan izdestirý jáne tergeý amaldary júrgizilip kelgen.
Qazirgi tańda Qyzylqoǵa aýdanynda tabylǵan máiitter boiynsha adam óltirý belgilerimen qylmystyq is qozǵaldy. Kúdiktilerdiń jeke basy anyqtalǵan, olardy ustaý maqsatynda quqyq qorǵaý organdary jedel-izdestirý is-sharalaryn jalǵastyryp jatyr.
Sonymen qatar, taǵy eki joǵalǵan adamnyń júrgen jerin anyqtaý boiynsha izdeý jumystary júrgizilýde. Oqiǵanyń barlyq mán-jaiy anyqtalyp jatyr, tergeý múddesine bailanysty ózge aqparat ázirge jariia etilmeidi.
Quzyrly organdar áleýmettik jeli qoldanýshylaryn tek resmi derekkózderge súienýge jáne rastalmaǵan aqparatty taratpaýǵa shaqyrdy.
