«Isatai aýdanyndaǵy aýyldarda sý izdegen maldar aram ólip jatyr» degen aqparatty aýdan ákimi joqqa shyǵardy, dep habarlaidy "Ult aqparat" Atyraý oblysynyń óńirlik kommýnikatsiialar qyzmetine silteme jasap
Birqatar BAQ Isatai aýdanyndaǵy birneshe aýylda kanal sýy tartylyp, jylqy men iri qara aram qatyp jatqanyn habarlaǵan bolatyn.
Osyǵan orai, atalǵan aýdan ákimi Polymbet Hasanov máseleniń mán-jaiyn túsindirdi. Onyń aitýynsha, aýdanda kanal jáne kotlovandaǵy sý deńgeii az, biraq jappai mal ólimi bolmaǵan.
Aýdan basshysynyń aitýynsha, jýrnalister Facebook jelisine bir turǵynnan kelip túsken fotosýretterdi jariialaǵan.
«Biz sol jazbaǵa komment jazý arqyly áleýmettik jelidegi sýretterdi kimder jibergenin jáne mal ólimi naqty qai jerde oryn alǵanyn suradyq, eshqandai jaýap bolmady. Kelesi kúni dereý meniń orynbasarym mamandarmen birge Naryn kanalynyń boiyn jáne Manash kotlovanyn kózben kórip qaitty. Ras, asyp-tasyp jatqan sý bolmaǵanymen, biraq mal sýarýǵa jeterlik. Al, jappai qyrylyp jatqan mal deregi tirkelgen joq. Tek eki-úsh jerden ǵana kanaldyń batpaǵyna batyp, bolmasa aýyryp ólgen maldyń óleksesin keziktirýge bolady. Sý qazandyǵyna kóp mal kelip sý ishetinin eskersek, bul da - ádettegi jaǵdai. Bul týraly da jýrnalisterge tolyq túsinik berdik. Biraq, efirden basqasha aqparat aityldy» dep túsindirdi Polymbet Maksimuly.
Sondai-aq, aýdan ákimi sheshimin kútken máseleler de bar ekenin qosymsha aityp ótti.
– Aýdan aýmaǵy shóleitti, jeri qunarsyz jáne sortań bolyp keledi. Sońǵy jyldary qar men jaýyn-shashyn az mólsherde túsýde. Biraq, biylǵy kóktemde jańbyr mol jaýyp, jaiylymdyq jerge jaqsy jaǵdai týdy. Qum óńirinen basqa eldimekender maly Kaspii teńiziniń jaǵalaýy men Jaiyqtan bastaý alatyn aýdan aýmaǵyndaǵy kanaldardan sý ishedi. Ondaǵy sý deńgeii birqalypty. Áitse de, qaitalap óteiin, Manash kotlovanyndaǵy sý deńgeii tómendeý. Kanaldarǵa uzaq ýaqyt kúrdeli jóndeý júrgizilmegen, sý ótkizý deńgeii óte tómen. Solardyń biri – aýdandaǵy eń iri Naryn kanaly. Ol «QazSýshar» mekemesiniń teńgeriminde. Bul kanal Mahambet aýdanyndaǵy Sarytoǵai aýylynan bastalyp, Isatai aýdany aýmaǵyndaǵy tórt aýyldyq okrýgten ótip, Naryn aýyldyq okrýgine deiin barady. Sondyqtan, «birneshe aýyldyń maly qyrylyp jatyr» degen – eshqandai dáieksiz áńgime, - deidi aýdan basshysy.
