Atyraýda Jaiyq ózenine bekire tuqymdas balyqtyń 100 myń shabaǵy jiberildi, dep habarlaidy "Ult aqparat".
Budan buryn Atyraýda balyq ósiretin zaýyt eksportqa qara ýyldyryq shyǵaratyny habarlanǵan bolatyn.
Biyl «Caspian Royal Fish» JShS-niń toǵandarda bekire balyqtarynyń shabaǵyn ósire bastaǵan. Shabaqtar 3-10 gramǵa deiin ósirilgen. Oblystyq balyq sharýashylyǵy basqarmasynyń basshysy Artýr Sádibekulynyń aitýynsha, bul – seriktestiktegi úsh toǵannyń birinen jiberilgen shabaqtar. Ózenge jiberilgen shabaqtyń sany 100 myńdy quraidy.
«Mańǵystaý oblysynyń tabiǵat paidalanýshylarymen kelisimshart jasalǵan bolatyn. Sonyń biri – «Aktaý-Balyk LTD» JShS Jaiyq ózenine bekire tuqymdas balyqtardyń shabaq jiberýge qoldaý bildirdi. Osylaisha, biz óńirdegi sý aidynyn bekire tuqymdas balyqtardyń qorymen tolyqtyrýǵa úles qosýdy kózdedik», -deidi basqarma basshysy Artýr Sádibekuly.
Atalǵan seriktestiktiń zaýytyna 2014 jyly Bashqurtstannan 15 myń bekire tuqymdas balyq ákelingen. Polshadan orys bekiresiniń 100 myń dana ýyldyryǵy alynyp, zaýyttaǵy basseinderde ósirilgen. Alty jylda balyqtardyń salmaǵy 8-9 kelige jetken.
Qazir seriktestiktiń zaýytynda baǵaly bekire balyqtarynyń tórt túri – orys bekiresi, súirik, qorytpa men sibir bekiresi ósiriledi. Arasynda 3-5 jyldan beri ósirilip jatqan balyqtar bar.
«Bizdiń seriktestikpen birneshe tabiǵat paidalanýshy tyǵyz bailanys ornatqan. Onyń ishinde «Jýmamýratov K.E.», «Shabarov V.A.», «Samarov A.V.», «Invalidy voiny v Afganistane», «Mikor», «Rozenko V.V.», «Tolqyn», «AN-grýpp», «Kolesnik S.V.», «Taýshyq aýyl sharýashylyǵy», «Batys Mýnai Trans», «Isatai Opereiting Kompani» jáne «Aktaý balyk kompani» seriktestikteri bar. Búgin osy seriktestikter men oblystyq balyq sharýashylyǵy basqarmasynyń ókilderinen qurylǵan komissiia músheleri shabaqtardyń sanyn eseptedi. Sodan soń, shabaqtar arnaiy turbamen aqqan sýmen Jaiyq ózenine jiberildi», - deidi «Caspian Royal Fish» JShS-niń bas balyq ósirýshisi Ahat Nimatov.
