Búgin «qyzyl» aimaqtaǵy Atyraý oblysynda júlde qory 40 mln teńgeni quraityn aqshalai utys oiyny bastaldy, dep habarlaidy "Ult aqparat".
Bul is-sharany «Azamattyq Alians» zańdy tulǵalar birlestigi uiymdastyryp otyr.
«Aqshalai utystyń júlde qory – 40 mln teńge. Onyń 10 mln teńgesi bas júlde úshin beriledi. Búgin, 30 maýsymynan bastap 200 myń teńgelik 10 sertifikat ár on kún saiyn 30 qyrkúiekke deiin vaktsina alǵandar arasynda oinatylady. Tamyz aiynda 30 maýsym-31 shilde aralyǵynda vaktsina alǵandar úshin 3 mln teńge kóleminde 2 sertifikat utysqa túsedi. Al, qyrkúiekte 1-31 tamyz aralyǵynda ekpe alǵandar úshin taǵy 3 million teńgeniń 2 sertifikaty oinatylady. Qazan aiynda bas júlde – 10 mln teńgeni utý úshin 1 aqpan-30 qyrkúiek aralyǵynda vaktsinanyń I nemese II komponentin saldyrǵan turǵyndar qatysa alady», - deidi «Azamattyq Alians» ZTB tóraǵasy Álibek Semǵaliev.
Onyń aitýynsha, jeńimpazdar Atyraý oblysynyń «Azamattyq Alians» ZTB-nyń áleýmettik jelisindegi tikelei efirinde anyqtalady. Oǵan aktsiianyń ashyqtyǵyn qamtamasyz etý úshin úkimettik emes uiymdardyń ókilderi, blogerler men qoǵam belsendileri tartylmaq.
