Atyraýda 20-21 qyrkúiek kúnderi «Atyrau Urban weekend» talqylaý sharasy ótti. Onda qalamyzdyń búgingi jaǵdaiy jaiynda pikir almasyp, onyń turmysy men tirshiligin jaqsartýǵa múddeli bolatyn múmkindikter týrasynda talqylandy.
Azamattyq ortalyqtyń uiymdastyrýymen ótken sharaǵa Atyraý turǵyndary, zeinetkerler, qalalyq ákimdiktiń ókilderi, eriktiler men qala belsendileri, sarapshylar qatysty.
Sharaǵa spiker retinde Almatydaǵy «Urban Forum Kazakhstan» jobasynyń basshysy Ásel Esjanova jáne osy jobanyń quryltaishysy Ádil Nurmaqov ta qatysty.
Olar «Ýrbanistikanyń zamanaýi úrdisteri», «Atyraýdyń jailylyǵyn zertteý» taqyryptarynda sóz qozǵady.
Spikerler qalanyń qoǵamdyq oryndarynda DIY (ózińiz jasańyz) sessiiasyn jáne jobalaý ádisterin qoldana otyryp, qorshaǵan ortany jaqsartý joldaryn aitty.
Sondai-aq, «Tań» damytý jáne qoldaý qorynyń eksperti Shynar Iztileýova «Qoǵamǵa kópshiliktiń aralasýy jáne júrgizilgen taldaý nátijeleri» taqyrybynda qatysýshylarǵa 2018 jyly júrgizilgen taldaý nátijelerin túsindirdi.
Atyraý qalasynyń turǵyndary úshin qalanyń jailylyǵyn taldaý nátijeleri 2018 jyly Chevron kompaniiasynyń qoldaýymen Urban Forum Kazakhstan ótkizgen bolatyn. 300 adam qatysqan analiz qorytyndysy boiynsha, turǵyndardyń 41%-y basqa qalaǵa kóshkisi keletinin aitsa, 27%-y kóshkim kelmeidi dep jaýap bergen. Turǵyndardyń qalǵany jaýap berýge qinalaǵann. Osyndai máselelerdiń sheshimin qatysýshylar birge talqylady.
Ýrbanizatsiia - Qazaqstan úshin sózsiz adami kapital men ál-aýqattyń damýyn qamtamasyz etýshi quraldardyń biri. Ýrbandalǵan ortada qalaǵa tán ózindik erekshe mádeniet qalyptasady, halyqtyń áleýetin damytýǵa barlyq jaǵdai jasalady jáne jańa tehnologiialarǵa, jańa kásip túrlerine beiimdelý tez júredi.
Damyǵan elderdegidei orasan zor óndiristik qýat, aqparattyq, innovatsiialyq jáne áleýmettik-ekonomikalyq áleýet shoǵyrlanǵan megapolister memlekettik bailyqtyń negizgi ósimin qamtamasyz etýi Qazaqstan úshin de mańyzdy.
Birinshiden, qalalar qurylysy men eldi mekenderdi damytý barysynda azamattardyń múddesin eskerý qajet. Halyqtyń densaýlyǵyn jáne ómir súrý jailylyǵyn barlyǵynan joǵary qoiý kerek. Ol úshin barsha qala turǵyndaryna tiesili qalalyq tirkeýge turýdy jeńildetý, áleýmettik qyzmet kórsetý júiesin jetildirý qajet.
Ekinshiden, qalalar qurylymyn ońtailandyryp, ǵylymdy damytýǵa barsha qalalyq resýrstardy jumyldyrý mańyzdy. Iri eldi mekenderdegi qurylysqa arnalǵan jáne aýyl sharýashylyǵy maqsatyna paidalanylatyn jerlerdi qatań baqylaýǵa alý qajettiligi de bar.
Aita keteiik, eki kúndik sharanyń alǵashqy kúni búgingi zamanǵy qolaily orta, jaily qala qandai bolýy kerek, qazirgi qoǵam jáne ekologiia, Atyraý qalasynyń barlyq turǵyndar úshin qoljetimdiligi jaily sarapshylar men qatysýshylar pikir almasty. «180 sekýnd ishindegi qala» kinosy kórsetildi.
