Atyraý qalasy aýmaǵynan 94 zańsyz qoqys orny anyqtaldy. Bul týraly Ortalyq kommýnikatsiialar qyzmetindegi brifing barysynda Atyraý oblysynyń ákimi Mahambet Dosmuhambetov aitty, dep habarlaidy QazAqparat.
«Óńirimiz úshin ózekti máseleniń biri - ekologiialyq ahýal ekeni ózderińizge de málim. Jyl basynan beri ǵaryshtyq monitoringileý arqyly Atyraý qalasy aýmaǵynan 94 zańsyz qoqys orny anyqtaldy. Olardyń 39-y tazalandy, 42-sinde tazalaý jumystary júrgizilýde, al qalǵan 13 qoqys ornynyń ieleri anyqtalýda. 2020 jyly Atyraý qalasynda 484 tirkelmegen qoqys oryndary anyqtalyp, barlyǵy joiylǵan bolatyn», - dedi Mahambet Dosmuhambetov.
Sonymen qatar oblys basshysy Prezidenttiń 2025 jylǵa deiin orman alqabynda jappai tal egý men eldi mekenderdi kógaldandyrýdy tapsyrmasy boiynsha aýqymdy jumystar bastalǵanyn aitty.
«Biyl 700 myńǵa jýyq ekpe, 50 myńǵa jýyq kóshetter otyrǵyzyldy. Aldaǵy bes jylda oblystyń orman qory jerlerine 7 million kóshet, al eldi mekenderge – 540 myń tal otyrǵyzý qarastyrylǵan. Óńirdegi «Teńizshevroil», NCOC, AMÓZ jáne «Embimunaigaz» syndy iri munai-gaz kásiporyndarymen de kógaldandyrý jumystaryna qatysty memorandým jasaldy. Olar osy kúzde jumystaryn bastaidy», - dedi ol.
