Atyraý oblysynyń ákimi Mahambet Dosmuhambetov balalar úiindegi sábilerdiń tusaýyn kesti, dep habarlaidy "Ult aqparat".
Búgin oblys basshysy Mamandandyrylǵan balalar úiiniń tárbielenýshilerin Halyqaralyq balalardy qorǵaý kúni merekesimen quttyqtap bardy. Ákim eki sábidiń tusaýyn da kesti.
Tusaýy kesilgen balaqailardyń biri ata-ana qamqorlyǵynsyz qalǵan, ekinshisin múmkindigi shekteýli anasy ortalyqqa ýaqytsha tapsyrǵan.
«Týǵanynan ana meiirimin kórmei, ósip kele jatqan balalardyń mahabbat pen qamqorlyqqa óte zárý ekenin bilemiz. Sondyqtan, balaqailar jaqsy otbasydan jaily oryn taýyp, týǵan eldiń laiyqty azamaty bolyp óskenin qalaimyz. Balalarǵa búgin ǵana emes, ár kún saiyn merekelik kóńil-kúi syilap, barynsha jaǵdai jasaýymyz kerek», - dedi oblys ákimi Mahambet Dosmuhambetov.
Mamandandyrylǵan balalar úiiniń basshysy Raisa Baimuhanovanyń málimetinshe, mekemedegi bir balany qaiyrymdy otbasy asyrap alǵan. Al, 6-aýy óz otbasyna oralǵan. Bir bala otbasylyq úlgidegi «Shańyraq» balalar aýylyna aýystyrylǵan. Qazir munda túrli aýrýǵa shaldyqqan 4 jasqa deiingi 23 bala bar. Balalardyń ortalyq nerv júiesi zaqymdanǵan. Sóilei almaidy. Tserebraldy sal aýrýyna ushyraǵan. Munda 50 qyzmetker jumys isteidi.
Halyqaralyq balalar kúnine orai barlyq tárbielenýshige syilyqtar berildi.
