Atyraý munai óńdeý zaýytynyń 700-den astam qyzmetkeri vaktsina saldyrdy, dep habarlaidy "Ult aqparat".
«AMÓZ» JShS-niń baspasóz qyzmetinen málim etkendei, kásipory men merdiger mekemelerdiń 700-den astam qyzmetkeri «Spýtnik V» vaktsinasyn saldyrǵan. Bul – kásiporyn qyzmetkerlerdiń shamamen 30%-y. Al, 160 qyzmetker vaktsinanyń II komponentin alyp otyr.
«Men únemi jumysta bolamyn. Kásiporynnyń injenerlik-tehnikalyq quramymen, merdiger mekemelerdiń qyzmetkerlerimen tyǵyz bailanysta jumys isteimin. Sondyqtan, COVID-19 infektsiiasyna qarsy ekpe saldyrdym. Jappai vaktsinalaý ǵana qaýipti virýstyń taralýyn toqtatady. Vaktsina jaqyndarymyzdyń densaýlyǵy men óz qaýipsizdigimizge alańdamai, qalypty jumys kestesine oralýǵa kómektesetinine senemin» - deidi munaidy tereń óńdeý óndirisiniń bastyǵy Abat Ábilhaiyrov.
