Halyq aldyndaǵy eseptik kezdesýin BAQ ókilderimen birge talqylaǵan Indýstriia jáne infraqurylymdyq damý ministri Beibit Atamqulov qoǵamdyq kólik jolaqtaryndaǵy shekteýlerdi azaitý bastamasy týraly pikir bildirdi, dep habarlaidy QazAqparat.
«Mundai bastamanyń negizi bar, árine. Jolda keptelis bolmaý úshin avtobýs jolaqtarymen basqa kólikterdiń júrýine ruqsat berilmekshi. Biz kólik saiasatyna jáne avtobýs parkterin damytýǵa jaýapty ministrlik retinde mynany aitqymyz keledi. Eger Ishki ister ministrligi osyndai túzetý engizse, jergilikti ákimdikter ózi jaýapty qalada, oblys ortalyǵynda ýrbanistika men joldardyń damýyn eseptei otyryp, ereje bekitýi kerek. Iaǵni, qai baǵyt pen qai ýchaskede kólikter avtobýs jolaǵyna túse alatynyn, qai baǵyt pen ýchaskede túse almaitynyn naqty bekitýi qajet. Eger bul sheshim avtobýs pen jolaýshylardyń qozǵalysyna kedergi keltirmeitin bolsa, qoldaimyz. Al bekitilgen erejeler avtobýstardyń qalypty qozǵalysyna kedergi keltirip jatsa, aralasýymyzǵa týra keledi», - dedi ministr.
Beibit Atamqulov Ishki ister ministrligi daiyndaǵan túzetýdiń saldary qandai bolatynyn, dál qazir boldaý múmkin emes degen oi aitty.
«Dál qazir avtobýs jolaqtaryna basqa kólikterdi jiberý qanshalyqty keptelis týǵyzatynyn baǵalaý múmkin emes. Ony sol jerdegi jergilikti organdar ǵana kóre alady. Sondyqtan da erejeni solar bekitýi kerek. Ishki ister ministrligi túzetý engizgen kúnniń ózinde ol jalpy ereje bolady. Al ár qaladaǵy jaǵdai jergilikti ákimdikterdiń erejesimen rettelýi kerek. Bizge qaladaǵy qoǵamdyq kólikterdiń saǵat siiaqty minsiz jumys istegeni kerek. Biz qyzmetin retteitin kásiporyndar shyǵyn da shekpei, úzdiksiz qyzmet kórsetýi kerek. Biz osyǵan kóńil bólemiz», - dedi vedomstvo basshysy.
