Foto: MAM
Roza Baǵlanova atyndaǵy «Qazaqkontsert» memlekettik akademiialyq kontserttik uiymynda kórnekti aqyn, aýdarmashy, Qazaqstannyń eńbek sińirgen qairatkeri Shómishbai Sarievtiń 80 jyldyǵyna arnalǵan «Atameken-ai» atty mereitoilyq kesh ótti, dep habarlaidy Ult.kz.
Kesh qatysýshylaryna Qazaqstan Respýblikasynyń Prezidenti Qasym-Jomart Toqaevtyń atynan gúl shoqtary joldandy. Is-shara barysynda QR Parlamenti Senatynyń tóraǵasy Máýlen Áshimbaev pen QR Premer-Ministriniń orynbasary – Mádeniet jáne aqparat ministri Aida Balaevanyń quttyqtaý hattary oqyldy. Keshke aqynnyń jary Jumagúl Sarieva da qatysty.
Kontsert baǵdarlamasy avtordyń el jadynda saqtalǵan tańdaýly shyǵarmalaryn qamtyp, onyń ulttyq mýzyka men poeziiadaǵy ornyn aiqyndai tústi. Sahnadan «Ainaldym senen, atameken-ai», «Qazaq eli», «Dombyra týraly ballada», «Ómir-ózen», «Saǵyndym, saǵym jyldar», «Aiaýlym», «Sen muńyńdy ber maǵan», «Erkelediń sen», «Ókinbe sen» jáne ózge de tanymal týyndylar shyrqaldy.
Keshke mádeniet jáne óner qairatkerleri, Qazaqstannyń eńbek sińirgen qairatkerleri, halyqaralyq jáne respýblikalyq baiqaýlardyń laýreattary qatysty. Sondai-aq «Gulder» ansambli, Qazaq memlekettik simfoniialyq orkestri jáne «Astana Musical» memlekettik teatry óner kórsetti. Keshtiń bas dirijeri – Dastan Ibragimov.
Shómishbai Sariev qazaq ádebieti men án óneriniń damýyna, sondai-aq aýdarma salasynyń qalyptasýyna eleýli úles qosty. Onyń shyǵarmalary birqatar shet tilderge aýdarylǵan. Aqyn 2000 jyly Býharestte ótken IýNESKO-nyń dúniejúzilik aqyndar simpoziýmyna qatysqan Qazaqstan men Ortalyq Aziiadan shyqqan jalǵyz ókil boldy.
Sonymen qatar ol qazaq qalamgerleri arasynda alǵashqylardyń biri bolyp «Ǵashyqtar jyry» jáne «Bozjorǵa» atty avtorlyq beinejazbalardy jaryqqa shyǵardy.
