Ata-analardyń balalaryn Ulttyq biryńǵai testileý ótkizý pýnktterinde kútýine tyiym salynady. Bul týraly Úkimet otyrysynda QR Bilim jáne ǵylym ministri Ashat Aimaǵambetov aitty, - dep habarlaidy QazAqparat.
«Ata-analarǵa jáne túlekterdi alyp júrýshi basqa tulǵalarǵa balalardy UBT ótkizý pýnktterinde kútýge tyiym salynady. Ata-analarǵa UBT ótý barysyn sol jerge kelmei-aq úiinde otyryp kórý úshin onlain kórsetilimdi uiymdastyramyz. UBT ótkizý pýnktteri tosqaýyl taspalarymen jabdyqtalady. UBT ótkizý pýnktterine kirý tártibinde testileýshilerdiń arasynda 2 metr qashyqtyqtyń saqtalýy qamtamasyz etiledi. Bul 2 metr araqashyqtyq UBT tapsyratyn aýditoriia ishinde de saqtalady», - dedi ministr.
Onyń atap ótýinshe, koronavirýstyń taralý qaýpin azaitýǵa arnalǵan qosymsha taǵy 5 saqtyq sharasy qoldanylady.
«Birinshiden - test tapsyrýshylardy zalasyzdandyrý týnnelderinen ótkizý. Ekinshiden - aiaq kiimderdi arnaiy zalasyzdandyrý kilemshelerimen óńdeý. Úshinshi - edendi sanitaizerlermen zalasyzdandyrý. Tórtinshi - ár talapkerdiń dene qyzýyn ólsheý. Besinshi - bir jolǵy qoldanylatyn jańa maskalar berý. Jalpy, bas sanitarlyq dárigermen kelisilgen qatań sanitarlyq talaptar barlyq jerde saqtalatyn bolady», - dedi Ashat Aimaǵambetov.
Ulttyq biryńǵai testileý ótkizý kezinde túrli gadjetterdi, bailanys quraldaryn, shpargalkalardy, ádebietterdi kirgizýge tyiym salynady.
