Túrkistan oblysynda meiramhanada toilanyp jatqan túlekter keshi toqtatyldy. Bul týraly óńirdiń Politsiia departamentinen málim etti, dep habarlaidy "Ult aqparat".
Mobildik toptyń kezekti reidi kezinde Jetisai aýdandyq politsiia bóliminiń inspektory Erkebulan Ábýbákirov S.Qojanov kóshesiniń boiynda ornalasqan meiramhanada aýdanǵa qarasty aýyl mektepteriniń biriniń 11-synyp túlekteri kesh ótkizip jatqanyn anyqtaǵan. Oǵan ata-analar men ustazdar, bitirýshi oqýshylar, jalpy 50-den astam qonaq jinalǵan.
Anyqtalǵan jaitqa qatysty toihana iesi men uiymdastyrýshyǵa QR ÁQBtK-niń 425-babymen («Halyqtyq sanitariialyq-epidemiologiialyq salamattylyǵy salasyndaǵy zańnama talaptaryn, sondai-aq gigienalyq normativterdi buzý») is-qujattar jinaqtalyp, shara qabyldaý úshin Jetisai aýdandyq Sanitariialyq-epidemiologiialyq baqylaý basqarmasyna joldandy.
«Odan bólek, politseiler aýdan kóleminde barlyq meiramhana men toihana, oiyn-saýyq oryndarynda túsindirý jumystaryn júrgizip, bul indetten araqashyqtyqty saqtap, maska rejimin saqtaǵanda ǵana joiýǵa bolatynyn jetkizdi.
Túrkistan oblysy Politsiia departamenti karantin rejimi kezinde bekitilgen talaptardy oryndamai, turǵyndardyń densaýlyǵyna qaýip tóndiretin azamattar tiisti jaýapqa tartylatynyn eskertedi. Sondyqtan Bas sanitarlyq dárigerdiń qaýlysynyń talaptaryn qatań saqtaý, betperde kiiý jáne araqashyqtyqty saqtaýdy esten shyǵarmańyz», - dedi oblystyq Politsiia departamentiniń baspasóz qyzmetinen.
