Qaraǵandy oblysynyń segizinshi synyp oqýshysy asyq atýdan ulttyq mektep ligasynda jeńiske jetti, dep habarlaidy "Ult aqparat".
17-21 mamyr aralyǵynda Kókshetaýda asyq atýdan Ulttyq mektep ligasy ótti. Oǵan 7—8 synyptardyń 50 oqýshysy, onyń ishinde Qaraǵandy oblysynan 6 adam qatysty.
Abai aýdanynyń segizinshi synyp oqýshysy Nurdáýlet Esimov «Altyn saqa» syilyǵynyń iegeri atandy. Bul júlde eń jaqsy oiynshyǵa beriledi.
Jarys jeńimpazyn Asyq atý respýblikalyq federatsiiasynyń vitse-prezidenti Jomart Sabyrjanov marapattady.
Nurdáýlet 14 jasta. Ol Abai aýdany Qulaiǵyr aýylynyń «Topar» jalpy bilim beretin mektebinde oqidy. Úzdik oqýshylar qatarynda.
Asyq oinaýmen 8 jasynan bastap ainalysady. Ony dene shynyqtyrý pániniń muǵalimi Nurlan Rahmetov jattyqtyrady.
Nurdáýlet – asyq atýdan aýdandyq jáne oblystyq jarystardyń jeńimpazy.
