Búgin Astana qalasynyń halyqaralyq áýejaiynda Rio Olimpiadasynyń chempiondary men júldegerlerin saltanatty kútip alý sharasy ótti, dep habarlaidy Baq.kz.
Túngi saǵat 1.30-da Astana áýejaiynda jankúierler men Olimpiadaǵa qatysqan sportshylardyń týǵan- týystary, dostary jinaldy.
Elordaǵa kelgen sportshylardyń qatarynda boksshylardan Birjan Jaqypov, Oljas Sáttibaev, Berik Ábdirahmanov, Qairat Eraliev, Abylaihan Júsipov, Jánibek Álimhanuly, Ivan Dychko, Ádilbekov Niiazymbetov, Vasilii Levit, Daniiar Eleýsinov, Jaina Shekerbekova, Dariǵa Shákimova, al balýandardan Juldyz Eshimova, Ekaterina Larionova, Elmira Syzdyqova, Gúzel Maniýrova boldy.
Bairaqty básekege qatysýshylardy kútip alýǵa Astana qalasynyń ákimi Áset Isekeshev te keldi.
«Olimpiada juldyzdaryn quttyqtaimyn. Sizder halyqtyń jáne osynda turǵan azamattardyń senimin aqtadyńyzdar. Sizder tórtjyldyqtyń basty dodasynda el namysyn qorǵadyńyzdar. Sizder naǵyz batyrsyzdar. Men sizderdiń jattyqtyrýshylaryńyzdy jáne ata-analaryńyzdy uly jeńispen quttyqtaimyn. Jeńisten jeńiske jete berińizder», – dedi qala ákimi.
Al Rio Olimpiadasynyń chempiony Daniiar Eleýsinov jankúierlerge sheksiz alǵysyn bildirdi.
«Qoldaý kórsetkenderińiz úshin rahmet. Muhittyń arǵy jaǵynda bolsaq ta jankúier bolǵandaryńyzdy sezindik. Birinshiden, sportshylarǵa osyndai jaǵdai jasap jatqan Elbasy Nursultan Nazarbaevqa myń alǵys. Astana qalasynyń ákimi Áset Isekeshevke de alǵysymdy bildiremin. Osyndai jetistikke jetýimiz bapkerlerimizdiń arqasy. Ári ákeme jáne bas bapkerge jeke alǵysymdy bildiremin», – dedi bokstan Qazaqstan quramasynyń kapitany.
Sonymen qatar qala ákimi Rio Olimpiadasynyń júldegerlerine jańa kóliktiń kiltin tabystady. Sondai-aq Áset Isekeshev olarǵa jańa páter beriletindigin atap ótti.
Aita keteiik, osy jylǵy Olimpiada oiyndaryna 28 sport túrinen 206 memleket pen bosqyndar komandalarynan 10 myńnan astam sportshy qatysty.
Tórtjyldyqtyń basty dodasynda elimizdiń namysyn 26 sport túrinen 104 sportshy qorǵady.
Qazaqstan quramasy 17 medalmen (Z altyn, 5 kúmis, 9 qola) jalpykomandalyq esepte 22-shi orynǵa ie boldy.
