Aqparat jáne qoǵamdyq damý ministri Aida Balaeva BAQ basshylarymen, bas redaktorlarmen onlain-kezdesý ótkizip jatyr, dep habarlaidy QazAqparat.
«Bas redaktorlar klýby» qoǵamdyq birlestiginiń bastamasymen ótkizilip jatqan onlain-kezdesýge BAQ basshylary, túrli memlekettik jáne aimaqtyq BAQ quraldarynyń bas redaktorlary men azamattyq qoǵam ókilderi, ministrliktiń qyzmetkerleri de qatysýda.
«Búgin beibit jinalystar kezindegi jýrnalisterdiń jumysyn talqylaimyz. Sóz joq, bul másele qazirgi tańda óte ózekti. Búgin konstrýktivti dialog bolaryna senemiz», - dedi Aida Balaeva onlain kezdesý barysynda.
Ministr 2020 jyldyń 25 mamyrynda Memleket basshysy beibit jinalystardy uiymdastyrý men ótkizý týraly zańǵa qol qoiǵanyn eske saldy.
«Bul zańnamanyń jańashyldyǵy – beibit jinalystar kezindegi jýrnalisterdiń jumysy. Bul jerde qandai da bir shekteý týraly sóz qozǵalyp otyrǵan joq. Eń birinshi kezekte jýrnalisterdiń jumysyna jaily jaǵdai jasaý kerek. Sonymen qatar erejelerdi daiarlaý barysynda biz UNESCO-nyń keńesterine qulaq astyq», - dedi Aida Balaeva.
Aida Balaeva qaǵidalardyń negizgi erejelerine nazar aýdarýǵa shaqyrdy.
«Birinshiden jýrnalistiń kásibi qyzmetin qamtamasyz etý maqsatynda jergilikti atqarýshy organdar baspasóz ortalyqtaryna arnalǵan oryndardy qamtamasyz etedi. Atalǵan baspasóz ortalyqtary kelesi jaǵdailarda uiymdastyrylatynyn atap ótken jón. Birinshi - beibit jinalysqa qatysýshylardyń sany 200 adamnan asqan jaǵdaida. Ekinshi – BAQ-tyń jergilikti atqarýshy organdarǵa jasaǵan suraýy boiynsha. Degenmen jýrnalisterdiń óz qyzmetin atqarýy – tek osy baspasóz ortalyǵymen shektelip qalmaidy», - dedi ministr.
Ol sonymen qatar jedel baspasóz ortalyqtaryna biryńǵai talap qoiylatynyn atap ótti.
«Máselen olar tiisti materialdyq-tehnikalyq jabdyqtardy, elektrmen qoljetimdilikti, aqparatty bere alatyndai jaǵdaidy, shekteýshi lentalardy, foto nemese videotúsirilim júrgize alatyndai jaǵdaidy qamtamasyz etýi kerek. Jýrnalisterdiń qaýipsizdigin qamtamasyz etý úshin mundai oryndarda ishki ister organdarynyń qyzmetkerlerin turǵyzý usynylady», - dedi ol.
Ministr sonymen birge BAQ pen jergilikti atqarýshy organdardyń ózara is-qimylynyń tártibi engiziletinin aityp ótti.
«Jergilikti atqarýshy organ óz ókiliniń beibit jinalysqa qatysýyn qamtamasyz etedi. Ókildiń qyzmeti – jýrnalisterdiń qaýipsizdigin qamtamasyz etýge baǵyttalǵan sharalardy túsindirý. Jýrnalisterge beibit jinalystyń qatysýshylary men uiymdastyrýshylarynan suhbat alýǵa járdemdesý. Qajet bolǵan jaǵdaida beibit jinalysta kóterilgen máseleler boiynsha júkteme alý úshin memlekettik organdardyń baspasóz hatshylarymen bailanys derekterin usyný», - dedi ol.
Aida Balaeva jýrnalisterdiń aiyrym belgilerin tańdaý – BAQ-tyń ózinde qalatynyn aitady.
«Iaǵni qaǵidada usynylǵan bir nemese birneshe erekshelik belgilerin paidalanýǵa bolady. Bul keýdeshe, jeńgetańǵysh, jeńil jeide nemese arqaǵa japsyrma bolýy múmkin», - dedi Aida Balaeva.
