Foto: Astana qalasy ákimdigi saitynan
Astanada Respýblika kúnin merekeleý qarsańynda dástúr boiynsha muqtaj azamattarǵa azyq-túlik sebetteri taratylady, dep habarlaidy elorda ákimdiginiń resmi saity.
Astana qalasy ákimdigi men «Astana Jastary» eriktileri Qazaq oil kompaniiasymen birlesip uiymdastyrǵan bul igi sharada elordanyń áleýmettik az qamtylǵan, kópbalaly otbasylaryna, sondai-aq erekshe balalardy tárbielep otyrǵandarǵa 1 myń sebet azyq-túlik úlestirildi. Is-sharaǵa 100-ge jýyq volonter qatysty.
«Respýblika kúnine arnalǵan bul qaiyrymdylyq aktsiiasy 3 jyldan beri ótkizilip keledi. Búginde elordanyń 5 aýdanyndaǵy áleýmettik osal otbasylarǵa 1 myń sebet taratyldy. Olar – kópbalaly otbasylar, jalǵyz basty analar, zeinetkerler, múmkindigi shekteýli azamattar, erekshe balalardy tárbielep otyrǵan otbasylar. Azyq-túlik sebetinde kúndelikti ómirge qajetti taýarlar bar. Atap aitsaq, kúnbaǵys maiy, qant, un, sút jáne t.b.», - dedi Astana ákiminiń keńesshisi Qýanysh Moldabek.
Qýanysh Moldabektiń aitýynsha, jalpy salmaǵy 45 tonnadan asatyn azyq-túlik sebetteri búgin jetkiziledi.
«Biz Qazaq oil kompaniiasyna osy qaiyrymdylyq sharaǵa belsendi qatysqany úshin alǵysymyzdy bildiremiz. Basqa da biznes ókilderi men metsenattardy osyndai igi isterge atsalysýǵa shaqyramyz. Qala ákimdigi mundai sharalardy jyl saiyn ótkizip turady», - dedi Qýanysh Moldabek.
Igiligi mol mundai is-sharaǵa azyq-túlik sebetin alǵan otbasylar alǵystaryn bildirdi.
«Mereke qarsańynda mundai quttyqtaý biz úshin kútpegen jaǵdai boldy. Osy sátti paidalanyp, barshańyzdy Respýblika kúnimen quttyqtaǵym keledi», - dep erekshe bala tárbielep otyrǵan Astana turǵyny alǵysyn bildirdi.
Esterińizge sala keteiik, Astanada Respýblika kúnine orai 100-den astam mádeni-aǵartýshylyq, sporttyq jáne áleýmettik is-shara, onyń ishinde merekelik kontsertter, kórmeler, dóńgelek ústelder, ulttyq sport túrlerinen týrnirler jáne basqa da kóptegen sharalar josparlanǵan.
Is-sharalar ortalyq alańdar men iri nysandarda, sondai-aq turǵyn aýdandarda, bilim berý uiymdarynda jáne t.b. ótedi.
Sondai-aq, 25 qazan kúni saǵat 21:00-de Astana qalasyndaǵy Triatlon saiabaǵynyń (Pirs aýdany) aýmaǵynda demeýshilik esebinen uiymdastyrylǵan merekelik otshashý josparlanyp otyr.
