Búgin Astanadaǵy «Qazaqstan» ortalyq kontsert zalynda Elbasy Nursultan Nazarbaevtyń qatysýymen Olimpiada chempiondaryna qurmet kórsetý sharasy ótedi. Dástúr boiynsha chempiondar aldymen kortejben Astana kóshelerimen júrip ótedi. Sodan keiin «Qazaqstan» zalynda ótetin saltanatty sharaǵa qatysady, dep habarlaidy "Ult aqparat" Baq.kz portalyna silteme jasap.
Aita keteiik, Braziliianyń Rio-de-Janeiro qalasynda ótken Olimpiada oiyndarynda Qazaqstan sportshylary úsh altyn, bes kúmis, toǵyz qola medal jeńip alǵan bolatyn. Jalpykomandalyq esepte ulttyq quramamyz 22-shi oryndy ielenip, medal sany jaǵynan rekord ornatty. Buǵan deiin Atlantada - 11, Sidneide - 7, Afinyda - 8, Pekinde - 13, al London Olimpiadasynda 13 medal enshilegen bolatynbyz. Bul joly qorjynǵa 17 júlde tústi.
Rio-Olimpiadasynda sportshylarymyz Nijat Rahymov, Daniiar Eleýsinov jáne Dmitrii Balandin altyn alsa, Jazira Japparqul, Eldos Smetov, Vasilii Levit, Ádilbek Niiazymbetov pen Giýzel Maniýrova kúmis medalǵa qol jetkizdi. Qola júlde alǵandardyń qatarynda Galbadrah Otgontsetseg, Farhad Harki, Karina Goricheva, Aleksandr Zaichikov, Olga Rypakova, Elmira Syzdyqova, Ekaterina Larionova, Ivan Dychko, Dariǵa Shákimova bar.
Osy jylǵy Olimpiada oiyndaryna 28 sport túrinen 206 memleket pen bosqyndar komandalarynan 10 myńnan astam sportshy qatysty. Bairaqty básekede 306 medal jiyntyǵy sarapqa salyndy. Tórtjyldyqtyń basty dodasynda elimizdiń namysyn 26 sport túrinen 104 sportshy qorǵady. Kúni keshe QR Ulttyq Olimpiada komitetiniń prezidenti Timýr Qulybaev pen QR Mádeniet jáne sport ministri Arystanbek Muhamediuly Rio-de-Janeiroda ótken jazǵy Olimpiada oiyndarynyń chempiondary men júldegerlerimen kezdesken bolatyn.
