Foto: MAM
Astanadaǵy HAS SANAT óner galereiasynda Qazaqstan men Qyrǵyzstan sýretshileriniń «Nur shashý» atty halyqaralyq kórmesi ashyldy. Ekspozitsiiaǵa Ásel Tileýlen, Sansyz Mirziraimov, Abai Nasiridin ýýlý jáne Islam Doorovtyń 60-tan astam keskindeme týyndysy qoiylǵan, dep habarlaidy Ult.kz.
Kórme ózegine adam janyndaǵy sáýle, ishki tazarý men rýhani tereńdik taqyryby arqaý bolǵan. Sýretshiler bul uǵymdardy ártúrli kórkemdik máner, dara qoltańba jáne beineleý tásilderi arqyly kórsetken.
Shyǵarmashylyq ustanymdary bólek bolǵanymen, ekspozitsiia tutastai alǵanda jan tynyshtyǵy, úmit, rýhani tirek jáne adam seziminiń tereń bolmysy jaiyndaǵy ortaq kórkem oidy alǵa shyǵarady.
Kórme qatysýshylary men qonaqtaryna Qazaqstan Respýblikasy Premer-Ministriniń orynbasary – Mádeniet jáne aqparat ministri Aida Balaevanyń quttyqtaý haty oqyldy. Óz quttyqtaýynda Úkimet basshysynyń orynbasary mundai jobalardyń mádeni bailanystardy nyǵaityp, halyqtar arasyndaǵy rýhani jaqyndyqty tereńdete túsýdegi erekshe mańyzyn atap ótti.
«Bul kórme – zamanaýi beineleý óneriniń tańdaýly týyndylaryn toǵystyrǵan, shyǵarmashylyq izdenis pen rýhani sabaqtastyqty aishyqtaityn taǵylymdy mádeni oqiǵa dep bilemin. Kórmege elimizdiń, sondai-aq Qyrǵyz Respýblikasynyń belgili qylqalam sheberleri qatysýda. «Nur shashý» kórmesi – sýretshilerdiń shyǵarmashylyq jetistikterin tanytatyn alań ǵana emes, sonymen birge mádenietter toǵysynyń, óner arqyly rýhani úndesýdiń jarqyn kórinisi», – delingen quttyqtaý hatynda.
Kórmege qatysýshy qylqalam ieleri túgeldei keskindeme janrynda eńbek etedi. Soǵan qaramastan, ár sýretshi ortaq taqyrypty ózindik tanym-túisigimen, ózine tán stildik ereksheligimen ashady.
Ekspozitsiiada portret pen peizaj, abstraktsiia elementteri men ishki úilesimge qurylǵan kórkem izdenister tabiǵi sabaqtastyq tapqan.
Kórme 2026 jylǵy 11 mamyrǵa deiin jalǵasady.
