Foto: gov.kz
Astanada “Sirius Energy” ataýymen jumys istegen qarjy piramidasyna qatysty tergeý júrgizilip jatyr. Bul týraly Qarjylyq monitoring agenttigi habarlady.
Tergeý málimetinshe, kúdikti ózin chililik “Sirius Energy” kompaniiasynyń ókili retinde tanystyryp, azamattardy jańartylatyn energiia kózderi salasyndaǵy «joǵary tabys ákeletin» jobalarǵa investitsiia salýǵa úgittegen.
Investorlardan qarajat USDT kriptovaliýtasy arqyly qabyldanyp, salymshylarǵa shartty bonýstar kórsetiletin jeke kabinetter ashylǵan. Salymshylardy kóbirek tartý úshin uiymdastyrýshy Almaty men Astanada keńseler ashyp, turaqty túrde treningter ótkizip otyrǵan.
Sonymen qatar ol Instagram jáne TikTok áleýmettik jelilerinde belsendi jarnama júrgizip, qyzmetiniń zańdy ekenin kórsetý maqsatynda úshinshi tulǵanyń atyna jeke jaýapkershiligi shekteýli seriktestik (JShS) tirkegen. Alaida is júzinde eshqandai naqty qyzmet kórsetilmegen.
Aldyn ala málimet boiynsha, 380 azamat qarjy piramidasynyń qurbanyna ainalǵan.
Jábirlenýshilerdiń biri joǵary tabys týraly ýádege senip, jobaǵa aqsha salý úshin 3 million teńge kóleminde nesie rásimdegen. Alaida ýáde etilgen tólemderdi ala almaǵan, endi nesieni paiyzymen birge óz qarajaty esebinen óteýge májbúr.
Sot sanktsiiasymen kúdiktiniń bank shottaryna tyiym salyndy. Tergeý jalǵasyp jatyr.
