Roza Baǵlanova atyndaǵy «Qazaqkontsert» memlekettik akademiialyq kontserttik uiymynda tanymal kompozitor, dirijer, «Qurmet», «Parasat» ordenderiniń iegeri, Qazaqstannyń eńbek sińirgen qairatkeri Áli Demegenuly Alpysbaevtyń 70 jas mereitoiyna arnalǵan mýzykalyq kesh óti.
Kontserttik baǵdarlamada kompozitordyń «Alash eli», «Tósbulaq» kúi-poemalary, «Áke», «Aqqýym bolyp oraldyń ba?», «Aman bolshy, jan ana», «Qazaq eli» ánderi jáne t.b. týyndylary oryndaldy.
Is-sharaǵa halyqaralyq baiqaýlardyń laýreaty Medet Esbergenov, «Kúreńbel» triosy, sondai-aq, Jomart Takebaev, Maqsat Nurlanov, Talǵat Orazaev, Tolqyn Skakova, Saltanat Muratqyzy, Shahzod Sana, Sáýle Alimbetova, Arýjan Jalǵasova, Jibek Músýrgalieva, Vatýlko Svetlana, Álseiit Shuǵyla, Aqbota Sabyrjanova, Samat Jeksenbaev, Gúlbaný Lahaeva, Nurjan Maily jáne Dánesh Raqyshev atyndaǵy Jetisý oblystyq filarmoniiasynyń estradalyq-simfoniialyq orkestri qatysty.
Kesh barysynda Áli Alpysbaevqa Aida Ǵalymqyzy Balaevanyń quttyqtaý haty joldandy. Hatty Qazaqstan Respýblikasy Mádeniet jáne aqparat ministrligi Mádeniet komitetiniń tóraǵasy Erlan Erǵazyuly Dákenov tabystady.
Áli Alpysbaev 50-den astam án jáne jeke mýzykalyq aspaptarǵa arnalǵan týyndylar jazdy. Onyń shyǵarmashylyǵy ulttyq dástúr tereńdigimen jáne zamanaýi mýzykalyq áýenimen erekshelenedi. Ol Muqan Tólebaev atyndaǵy halyqaralyq «Altyn taiaqsha» dirijerler baiqaýy men «Kesteli oramal» vokalshylar baiqaýynyń uiymdastyrýshysy. «Elge arnaý» poemasy boiynsha QR Mádeniet jáne aqparat ministrliginiń memlekettik grantynyń laýreaty jáne «Elim meniń» respýblikalyq baiqaýynyń birneshe dúrkin jeńimpazy atandy.
2015 jyly «Táýelsizdik tolǵaýy» atty VI respýblikalyq jańa óner týyndylary baiqaýyna qatysyp, «Orbulaq tańy» simfoniialyq kúi poemasymen Gran-pri ielendi. Kompozitordyń shyǵarmashylyq qyzmeti halyqaralyq deńgeide de jetistikterge jetti. Ol Resei, Qytai jáne Túrkiia siiaqty elderde gastroldik saparmen bolyp, halyqaralyq arenada óz ónerin pash etti. Sonymen qatar, Polshada ótken 8-shi Dúniejúzilik óner festivalinde joǵary kásibi deńgeiin kórsetip, elder arasyndaǵy mádeni bailanystardy nyǵaitýǵa óz úlesin qosty.
