«Astana Opera» balet trýppasynyń jetekshi solisi, Qazaqstannyń eńbek sińirgen qairatkeri Taiyr Ǵataýov 10 maýsym kúni qaitys boldy. Jaqynda belgili ártis jol apatyna ushyraǵan edi, dep habarlaidy "Ult aqparat" teatrdyń baspasóz qyzmetine silteme jasap.
Taiyr Ǵataýovtyń esimi qazaqstandyq balet jylnamasyna máńgilikke jazyldy, onyń eńbegi baǵa jetpes: ol elordadaǵy horeografiialyq ónerdiń negizin qalaýshylardyń biri boldy. Onyń gastroldik kestesi aýqymdy edi, solist Qazaqstannyń mártebesin shetelde asqaqtatyp, Frantsiia, Vengriia, Italiia jáne basqa elderde óner kórsetken. Kóptegen halyqaralyq baiqaýlardyń laýreaty, Qazaqstannyń eńbek sińirgen qairatkeri, «Debiýtter dostastyǵy» TMD jastar syilyǵynyń laýreaty – onyń marapattar tizimin uzaq jalǵastyra berýge bolady.
Taiyr Ǵataýov bi ustazynyń otbasynda dúniege kelgen, ákesi bala kúninen bastap zamanaýi jáne halyq bilerine degen mahabbatty boiyna sińdirip, A.Seleznev atyndaǵy horeografiialyq ýchilishege oqýǵa bergen. 2003 jyly ýchilisheni úzdik támamdaǵan soń Taiyr Kúlásh Baiseiitova atyndaǵy ulttyq opera jáne balet teatrynyń solisi atandy. Sol jerde 10 jyl eńbek etti. Al 2013 jyly «Astana Operanyń» jetekshi solisi boldy. 2007 jyly aty ańyzǵa ainalǵan milandyq La Skala teatrynda (Italiia) taǵylymdamadan ótti. 2018 jyly Qazaq ulttyq horeografiia akademiiasyn tamamdap, «Ónertaný ǵylymdarynyń magistri» biliktiligin aldy.
Taiyr Ǵataýov jarqyn da umytylmas beineler galereiasyn jasady. «Astana Opera» ónersúier qaýymynyń jadynda ol P.Chaikovskiidiń «Aqqý kólindegi» Zigfrid, P.Chaikovskiidiń «Shelkýnchik» baletindegi hanzada Shelkýnchik, L.Minkýstyń «Baiaderkasyndaǵy» Solor, L.Minkýstyń «Don Kihot» baletindegi Bazil retinde jáne ózge de kóptegen tamasha partiialarmen qala bermek.
«Onyń asqaq armandary, josparlary kóp edi, átteń, oida joqta ómiri toqtady. Qosh bol, bizdiń Taiyr» dep eske alady áriptesteri.
«Astana Opera» memlekettik opera jáne balet teatrynyń ujymy Qazaqstannyń eńbek sińirgen qairatkeri Taiyr Talǵatuly Ǵataýovtyń qaiǵyly qazasyna bailanysty marqumnyń týystary men jaqyndaryna kóńil aitady.
