Astana kúnin merekeleý aiasynda #MenińElordam jáne #ElbasyJáneMen Jastar aktsiialary bastaldy, dep habarlaidy "Ult aqparat".
Búgin «Jas ulan», Nur Otan partiiasy janyndaǵy Jas Otan Jastar qanatynyń jáne Qazaqstan halqy Assambleiasy janyndaǵy «Jarasym» respýblikalyq jastar uiymdarynyń bastamasymen Qazaqstan Táýelsizdiginiń 30 jyldyǵy aiasynda áleýmettik jelide Elorda kúnin merekeleýge arnalǵan #MenińElordam jáne #ElbasyJáneMen biryńǵai heshtegtermen jastar aktsiialary men chelendjder bastaldy.
«Qazaqstannyń barlyq óńirleriniń jastary Elbasyny quttyqtaýy jáne fotosýretterin jariialaýda. Atalǵan aktsiialar qoǵamda Qazaqstan Respýblikasynyń Tuńǵysh Prezidenti – Elbasy N.Á. Nazarbaevtyń qazaqstandyq memlekettilikti qurýdaǵy aýqymdy tarihi rólin nyǵaitýǵa, jastardyń boiynda patriotizm sezimin jáne óz elordasy men eli úshin maqtanysh sezimin odan ári damytýǵa, elordanyń rýhani, ekonomikalyq jáne áleýmettik áleýetin kórsetýge baǵyttalǵan», delingen habarlamada.
Aktsiia Instagram jáne Facebook áleýmettik jelilerinde onlain formatta ótkiziledi.
Ony óńirlik jastar uiymdarynyń kóshbasshylary men ókilderi, sondai-aq elimizdiń barlyq óńirleriniń jastar belsendileri, stýdent jastar qoldady.
