Astana áýejaiynda Rio Olimpiadasynan oralǵan elordalyq sportshylardy xalyq ystyq yqylaspen kútip aldy. Bul týraly QazAqparat habarlady.
Ushaqtan túsken Qazaqstannyń boks jáne kúres quramalary aldynan Astana ákimi Áset Isekeshev shyqty.
"Olimpiadaǵa attanar aldynda Sizder júldemen oralamyz dep ýáde ettińizder, sol údeden shyǵyp, mine, medal alyp keldińizder. Bizdiń olimpiadashylardy qarsy alaiyq! Altyn medal iegeri Daniiar Eleýsinov, kúmis medal iegerleri - Vasilii Levit jáne Gúzel Maniýrova! Daniiar naǵyz kapitanǵa laiyq ónerimen jarysty senimdi ótkizip, finalda óte ádemi núkte qoidy. Sen úshin biz jankúierlik ettik, qatty alańdadyq", - dedi ákim sportshylarǵa qaratyp aitqan sózinde.
Sonymen qatar Á. Isekeshev tóreshilerdiń qateliginen Olimpiada oiyndarynyń finalynda jeńilis tapqan Vasilii Levitke de sóz arnady.
"Vasilii Levit, bilesiń be, biz seni xalyqtyq Olimpiada chempiony dep sanaimyz! Ómirde bári bolady, biraq eń keremet jeńister áli seniń aldyńda ekenine senimdimin! Sen biz úshin - chempionsyń! Bizdiń Gúzel Maniýrova, Olimpiada jarysynan úshinshi márte medal oljalap, álemdik deńgeidegi sportshy ekenińdi dáleldediń. Quttyqtaimyz!", - dep atap ótti ol.
Bunyń aldynda xabarlaǵanymyzdai, sportshylardy kútip alý kezinde Astana ákimi Áset Isekeshev Olimpiada chempiony Daniiar Eleýsinovke, kúmis medal iegerleri - Gúzel Maniýrova men Vasilii Levitke páter men kólik kiltterin tabys etken bolatyn.
