Osydan biraz buryn, jańa oqý jyly bastalǵannyń qarsańynda Májilis depýtaty Aiqyn Qońyrov mektepterde «Bastaýysh áskeri daiyndyq» (BÁD) páni muǵalimderiniń 10-11 synyp oqýshylaryn jazdyq-qystyq áskeri formalar alýǵa májbúrlegendigin aityp dabyl kótergen. Baǵasy 50-60 myń teńgeden kem bolmaityn mundai kiimderdi alýǵa kóptegen ata-analardyń jaǵdaiy kele bermeitinin aitqan depýtat ondai asa qajet bolsa bolashaq jaýyngerleri úshin Qorǵanys ministrligi ózderi ápersin nemese Bilim jáne ǵylym ministrligi arnaiy qarajat bólsin dep máseleni tikesinen qoiǵan edi.
Bul myńdaǵan ata-ananyń oiynan shyǵyp, BAQ ataýly bastaryna kóterip jazǵan. Sol saýalǵa jýyrda eki ministrlikten de jaýap kelipti. Áskeri adamdarǵa tán dáldikpen Qorǵanys ministri S.Jasuzaqov: «Mektepterge áskeri daiarlyq sabaqtary úshin arnaiy kiim alý qajettiligi týraly eshqandai nusqaýlar berilgen joq. Qorǵanys ministrliginiń biýdjetinde oqýshylarǵa áskeri kiim alý jónindegi shyǵystar kózdelmegen» dep naqty, qysqa, nusqa jaýap beripti.
Al BǴM ministrliginen kelgen jaýap kópsózdilikten jarysqa túskendei biraz nárseni ezgen eken. Sonyń ishinde BÁD pánin ofitserler, praporshikter, qatardaǵy sarbazdar men soldattardyń árqaisysy qansha paiyzdan oqytatynyna deiin kórsetipti. Al áskeri kiimge qatysty sózbe-sóz keltirsek bylai delingen: «Qazirgi ýaqytta bilim men qorǵanys salasyndaǵy qoldanystaǵy zańnama men normativtik quqyqtyq aktilerde BÁD sabaqtarynda arnaiy kiim kiiý máselesi rettelmegen. Osyǵan bailanysty BÁD sabaqtarynda arnaiy áskeri kiim kiiý mindetti emes».
Jurtty dúrliktirip, áskeri kiim talap etip júrgender BÁD-ti oqytatyn jańaǵy praporshikter men soldattar bolyp shyqty... Ondailar «shash al dese bas alatyn» jaman minezderin mektepke de ákelgen siiaqty. Áiteýir másele aiaǵyna jetti, halyq kiim alady ekenbiz dep ýaiymdamaýyna bolady.
Serik ELEÝ, sarapshy
Ult portaly
