Foto: Ulttyq ulan
Áleýmettik jelilerde "áskerden qaldyrý" nemese "aq bilet" alyp berý boiynsha qyzmet kórsetý jarnamasy taratylyp jatyr. Osyǵan bailanysty Qorǵanys ministrligi merzimdi áskeri qyzmetke shaqyrýdy keiinge qaldyrý nemese odan bosatý týraly sheshim Qazaqstan Respýblikasynyń zańnamasyna sáikes tek shaqyrý komissiiasy tarapynan qabyldanatyn túsindiredi, - dep habarlandy vedomstvonyń resmi saitynda.
Áskerge shaqyrý máseleleri boiynsha zańgerlik keńes berý – zańdy qyzmet. Alaida meditsinalyq qujattardy qoldan jasaý, jalǵan diagnozdardy rásimdeý jáne áskeri qyzmetten jaltarýdyń ózge de zańsyz tásilderi deldaldar úshin de, shaqyrylýshylardyń ózderi úshin de qylmystyq jaýapkershilikke ákep soǵady.
"Vedomstvo azamattardy kúmándi shemalarǵa qatyspaýǵa jáne jergilikti áskeri basqarý organdary (áskeri komissariattar) nemese meditsinalyq komissiialar arqyly "máseleni sheship berýge" kepildik beremiz dep, azamattardy jańylystyratyn "áskeri komissariattardyń kómekshileriniń" aila-sharǵylaryna aldanbaýǵa shaqyrady", - delingen habarlamada.
Merzimdi qyzmet jastarǵa bilim berý jeńildikteri men granttar alý, kásibi daǵdylardy meńgerý, dene daiyndyǵyn nyǵaitý sekildi naqty múmkindikter beredi.
"Sonymen qatar, merzimdi áskeri qyzmet ótkerý kezinde jáne qyzmetten bosatylǵannan keiin eki ai ishinde áskeri qyzmetshiler úshin kredittik demalys (nesielik kanikýl) tetigi qoldanylady. Belgilengen merzimdi tolyq ótegen azamattarǵa bilim berý jeńildikteri usynylady. Sonyń ishinde olarǵa stýdenttik jataqhanadan oryn alýǵa da basym quqyq beriledi", - delingen saitta.
Sondai-aq, joǵary oqý ornyna UBT tapsyrmai-aq bilim berý grantyn alý múmkindigi qarastyrylǵan. Búgingi tańda elimizdiń joǵary oqý oryndarynda tegin bilim alýǵa arnalǵan sertifikattar merzimdi áskeri qyzmet ótkergen 9 myńnan astam qazaqstandyqqa berildi. Azamattar shaqyrý komissiiasynyń shaqyrý qaǵazy boiynsha jergilikti áskeri basqarý organdaryna kelýge mindetti.
