Foto: ashyq derekkóz
Áleýmettik jelide áskerde seksýaldyq zorlyq kórgenin aityp, qarjylai kómek suraǵan azamattyń oqiǵasy jalǵan bolyp shyqty. Alaiaqtyq pen kórineý jalǵan aqparat taratty degen kúdikpen 23 jastaǵy elorda turǵyny ustaldy, dep habarlady Polisia.kz.
23 aqpan kúni Threads áleýmettik jelisinde belgisiz akkaýnt arqyly jariialanǵan jazba kópshiliktiń nazaryn aýdarǵan. Onda avtor áskerde júrgen kezinde jynystyq zorlyq-zombylyqqa ushyraǵanyn, sodan beri qýdalaýdan qorqyp júrgenin aitqan. Ol bir jyl buryn áskerden oralǵanyn, biraq basynan ótken oqiǵany áli umyta almai júrgenin jazǵan.
Jazbada komandiri qorqytyp, jynystyq sipattaǵy áreketterge májbúrlegenin aityp, oqiǵanyń «qorqynyshty» tustaryn egjei-tegjeili sipattaǵan. Osy arqyly jeli qoldanýshylarynyń senimine kirip, ózine qarjylai kómek suraǵan. Tipti qaýip baryn alǵa tartyp, shetelge ketýi kerek ekenin aityp, bank rekvizitterin de jariialaǵan.
Post avtory jinalǵan aqshany elden ketýge jumsaitynyn málimdegen. Sonymen qatar bul jaǵdaidan keiin depressiiaǵa túskenin, burynǵy ómirine orala almai júrgenin jazyp, jurttyń janashyrlyǵyna áser etýge tyrysqan.
Alaida jeli qoldanýshylarynyń biri shotty tekserý úshin politsiiaǵa júgingennen keiin bul oqiǵanyń kúmándi tustary anyqtala bastaǵan. Jedel qyzmetkerler tek rekvizitterdi ǵana emes, oqiǵanyń ózin de teksergen.
Nátijesinde bank esepshoty 17 jastaǵy jasóspirimge tiesili ekeni belgili boldy. Onyń aitýynsha, hostelde tanysqan adam qaryzyn aýdarý úshin rekvizitterin suraǵan. Óz esepshottary buǵattalǵanyn aityp, basqa aýdarymdardy qabyldap berýin ótingen. Buǵan sengen jasóspirim jeke derekterin bergen. Eki kúnniń ishinde onyń shotyna 100-den astam aýdarym túsken.
Júrgizilgen jedel-izdestirý sharalary barysynda jalǵan jazbanyń avtory ustaldy. Tekserý kezinde onyń áskerde múlde bolmaǵany jáne áskeri qyzmetke esh qatysy joq ekeni anyqtaldy.
Tártip saqshylarynyń málimetinshe, kúdikti jalǵan aqparatty ádeii aqsha jinaý maqsatynda taratqanyn moiyndaǵan.
Qazir kórineý jalǵan aqparat taratý jáne alaiaqtyq faktileri boiynsha qylmystyq ister qozǵaldy. Kúdikti ýaqytsha ustaý izoliatoryna qamalyp, sot sanktsiiasymen qamaýǵa alynǵan. Oǵan birneshe jylǵa deiin bas bostandyǵynan aiyrý jazasy qarastyrylýy múmkin.
Politsiia azamattarǵa jalǵan aqparatqa senbeýge jáne beitanys adamdarǵa aqsha aýdarmaýǵa shaqyrdy.
