Foto: depositphotos.com
Aqpan aiynda Threads áleýmettik jelisinde Qazaqstan armiiasy týraly daýly jazba tarady. Onda ózin áskeri qyzmetker retinde tanystyrǵan azamat komandir tarapynan seksýaldyq zorlyq kórgenin málimdegen. Jazba qysqa ýaqyt ishinde keńinen tarap, qoǵamda qyzý talqylandy, dep habarlaidy Ult.kz.
Keiin jazba avtory óz paraqshasynda qarajat jinap jatqanyn habarlady. Onyń aitýynsha, jinalǵan qarajat shetelge kóship, páter jaldaýǵa jumsalmaq. Avtor aýdarymdar týraly esep jariialap otyrǵanyn, sońǵy málimet boiynsha 329 230 teńge jinalǵanyn aitqan.
Alaida Qazaqstan Respýblikasy Qorǵanys ministrligi bul málimdemelerge qatysty resmi túsinikteme berdi.
Ministrlik málimetinshe, tiisti organdar jan-jaqty tekserý júrgizgen. Tekserý barysynda jazba avtorynyń jeke basy anyqtalǵanymen, onyń jariialaǵan derekteri rastalmaǵan.
Vedomstvo ókilderiniń habarlaýynsha, atalǵan oqiǵa shyndyqqa janaspaidy jáne Qurlyqtaǵy Qazaqstan Qarýly kúshteriniń bedelin túsirý maqsatynda ádeii taratylǵan.
Sondai-aq materialdar protsessýaldyq sheshim qabyldaý úshin quqyq qorǵaý organdaryna joldanǵan. Qoldanystaǵy zańnamaǵa sáikes, ádeii jalǵan aqparat taratqany úshin qylmystyq jaýapkershilik kózdelgeni eskertildi.
Ministrlik azamattardy tekserilmegen aqparatqa senbeýge jáne tek resmi derekkózderge júginýge shaqyrdy.
