Foto: Qorǵanys ministrliginiń baspasóz qyzmeti
Qazaqstan Qarýly kúshterinde áskeri qyzmetshilerdi tamaqtandyrý júiesi túbegeili jańartylyp jatyr. Endi sarbazdarǵa burynǵydai bir ǵana mázir emes, birneshe taǵamnyń arasynan óz qalaýyn tańdaýǵa múmkindik beriledi, dep habarlaidy Ult.kz.
Qorǵanys ministrliginiń málimetinshe, jańa modelde “shved ústeli” elementteri engiziledi. Bul áskeri qyzmetshiler kún saiyn birneshe túrli birinshi jáne ekinshi taǵamnyń ishinen ózine unaǵanyn tańdai alady degen sóz. Sonymen qatar, pailardyń baǵasy ózgermeidi – júie tek tamaq daiyndaý men taratý protsesin ońtailandyrý arqyly iske asady.
Qazir elimizde 40 myńnan astam áskeri qyzmetshini tamaqpen 23 qyzmet kórsetýshi qamtamasyz etip otyr. Ministrlik bul júieni tolyqtai uzaq merzimdi negizge kóshirýdi josparlaǵan. Aldaǵy ýaqytta kelisimsharttar úsh jylǵa jasalyp, barlyq konkýrs rásimderi elektrondyq formatqa aýystyrylady. Bul ashyqtyqty arttyryp, sybailas jemqorlyq táýekelderin azaitýǵa múmkindik beredi.
Qorǵanys ministriniń tyl jáne áskeri infraqurylym jónindegi orynbasary Almaz Jumakeevtiń aitýynsha, jańa modeldiń basty maqsaty – áskeri qyzmetshiniń naqty qajettiligin eskerý.
Onyń sózinshe, “shved ústeli” júiesi sarbazǵa tańdaý erkindigin berip qana qoimai, taǵam túrlerin kóbeitip, tamaq sapasyn arttyrýǵa jol ashady. Eń bastysy – bul ózgerister qosymsha shyǵynsyz júzege asyrylady.
Sonymen qatar, tamaq ratsionyn ulttyq taǵamdarmen tolyqtyrý, kaloriia mólsherin arttyrý, dalalyq jaǵdaida tamaq sapasyn jaqsartý jáne áskeri aspazdar institýtyn damytý baǵytynda da jumystar júrgizilip jatyr.
